周嘉莉與陳嘉桓（Rose）、松岡李那往泰國為有線主持旅遊節目期間，因佩戴隱形眼鏡太久而未能除下，致弄傷眼，需急返港就醫。跟周嘉莉同一經理人公司的Rose，當然擔心師妹的情況，並指嘉莉眼睛出現不適的時候，正身處她的酒店房：「佢傷眼之前都仲喺我間房，佢話自己除唔到隱形眼鏡，所以返去自己房試吓滴眼藥水再除，點知都係除唔到，第二日就要返香港睇醫生，都估唔到咁嚴重。」

陳嘉桓希望師妹周嘉莉盡快康復，松岡也非常擔心拍檔的情況。

拍攝還有四日才完結，現在Rose與松岡需分擔周嘉莉的工作，對此Rose表示不會介意，最緊要師妹冇事：「最緊要佢雙眼冇事，希望佢快啲康復啦！」松岡透露與Rose繼續在當地進行拍攝，雖與周嘉莉不算太熟，但也非常擔心拍檔的情況。