童話故事中美麗的公主總得到幸運之神眷顧，最後與王子過着幸福美滿生活……人稱「香香公主」的岑麗香外形甜到漏，短時間內成為得寵花旦又有獎攞。跟童話公主一樣幸運的她卻獨欠愛情運，Mr. Right遲遲未出現，自認工作狂的她笑言要「開閘」接受追求者，望發展一段細水長流的愛情。

宅男女神香香憧憬一段童話式的浪漫愛情，正苦等Mr. Right出現！

香香於2010年贏得國際中華小姐冠軍，踏上燦爛星途！

外表Sweet到漏的香香，事業一帆風順，卻獨欠愛情運！

女神是怎樣煉成的？
誘人甜笑

無辜扮傻

可愛嘟嘴

攞命電眼

眼見好姊妹李亞男結婚，香香亦考慮為追求者「開閘」。

隻身留港的香香感激一路上有成班好姊妹護航。

香香激讚多次合作的羅仲謙耐心教她廣東話。

宅男女神岑麗香於2010年贏得國際中華小姐冠軍入行，個性可愛的她被網民封為「香香公主」！香香憧憬童話公主般的夢幻純潔愛情：「我細個好鍾意睇童話卡通，好鍾意啲公主角色，灰姑娘、白雪公主、小魚仙，佢哋每段愛情都好單純，雙方肯為另一半犧牲，心入面只得對方一個，我有時都會將自己代入去，想要一段好單純嘅愛情！」

苦等有心人

返回香港後，香香一直埋首工作，將愛情放至最低位置，眼見好姊妹李亞男與王祖藍有情人終成眷屬，令她萌起拍拖念頭，香香坦然會敞開心扉嘗試約會：「初初入行係百分百去晒工作度，但依家發現，唔可以將所有雞蛋放晒落一個籃，我哋係人唔係機器，要保持同家人、朋友關係，我會集中工作，同時等Mr. Right出現。（接受追求者？）會畀自己多啲機會試唔同嘢，識多啲新朋友都OK。（參加Speed Dating？）咁又唔會咁刻意，隨緣！（曾想早婚？）都有！16歲時想21歲結婚，之後想26、29，依家過晒，會交畀神，我想有個家庭，神覺得我Ready自然會畀我。」

專一男搶分

要贏得女神芳心，需具備甚麼條件？香香表示最重要是專一、誠實及幽默：「希望另一半好似我Best Friend咁咩都講得，佢要好誠實、心地好。（外形？）細個覺得王子都靚仔，好有吸引力，但人愈大愈覺得唔可以咁膚淺，要有內在美同腦，呢樣先係永遠！（要好浪漫？）人夾人，到時睇吓擦唔擦到呢個火花，我唔係一個重視禮物嘅人，但說話、動作會表現得好錫佢。（你係一個Sweet女友？）哈哈！麻麻哋啦！我係喊包嚟！但會想對我身邊嘅人Sweet，令佢哋開心。（易呷醋？）睇情況啦！唔會好小事就Get Mad（抓狂），但會『適當時候』咁呷醋，同埋睇人囉！如果對方係乖，就唔會令你呷醋！（以前曾呷醋？）有都好正常！最緊要係呷醋之後理性番，唔好畀怒氣框住自己。」

退出三角困局

入行以來，香香大多飾演甜姐兒，她於無綫劇集《巴不得媽媽……》、《貓屎媽媽》及《醋娘子》內都是扮演可愛討好的角色，而最近的《華麗轉身》則有較多內心戲。

香香難忘《醋》劇的「山楂」處處為人着想，她希望有角色的優點：「山楂只係妾侍，佢好單純，只想身邊人開心，我欣賞呢種性格。（似你真人？）都似，除咗唔接受要瓜分一個男人！哈！」

香香不接受花心漢，亦不會一腳踏兩船，曾有兩名男士同時對她展開追求，惟她沒有「左右逢源」，反而忍痛兩個都不愛：「嗰兩個男仔互相都認識，我好坦白同佢哋講呢件事，唔想件事複雜化，於是自己離開呢個困局，兩個都唔要，因為我揀邊個，另一個都會唔開心。」

感激好姊妹相伴

岑麗香選美後隻身留港發展，沒男友陪伴的她幸得一班圈中姊妹互相扶持，香香希望向她們說聲多謝：「好想多謝鍾嘉欣、王君馨、李亞男、苟芸慧，呢班一齊信主嘅姊妹，令我感覺到雖然我喺外國嚟，喺香港都係有屋企，無論係公事或私事，佢哋都會支持我！」她又讚賞多次合作的羅仲謙耐心地指導她廣東話：「我成日NG，佢要忍受我好渣嘅廣東話，訓練到佢EQ高咗！」