藝人曾江、謝賢、胡楓及Joe Junior昨日出發到俄羅斯拍新節目，四子出發前先在機場「開拖」，笑言遭Joe Junior害他爆粗的謝賢，獲曾江大讚講得「有娛樂性又有音樂感」，但被胡楓寸爆：「你唔會只講一句！」其後胡楓又寸謝賢與曾江冇人性。

胡楓（左起）、曾江、謝賢與Joe Junior在機場「開拖」，相當搞笑。

胡楓

謝賢攜四箱行李到俄羅斯，真係大陣仗。

曾江、謝賢、胡楓及Joe Junior昨日到俄羅斯為無綫節目《四個小生去旅行》取景，眾人在機場互窒，場面爆笑。談到要照顧年近八十、新加入的曾江，Joe Junior稱上次也負責照顧胡楓，謝賢聞言即重提上次的爆粗事件：「你照顧佢又害我講粗口？」在旁的曾江即說：「你啲粗口幾好聽，有娛樂性又有音樂感。」謝賢揚言今次不再爆粗，胡楓即說：「係今次真係唔會講一句！」

揶揄一日一美女

問到會否欣賞俄羅斯美女？謝賢說：「使乜睇，佢哋周街行，女人嘢唔好問我，我依家對女人冇興趣！」胡楓即爆料說：「佢真係對女人冇興趣，依家係對一個咋！」曾江也寸嘴說：「係一日一個！」胡楓又嘲攜同四箱行李出埠的謝賢準備移民俄羅斯！

對於有傳謝賢早前接受「通波仔」手術，醫生不建議他坐飛機遠行，謝賢說：「我幾時有波畀人通，我有胸啫，冇波。（好耐之前『通波仔』？）冇事嘅，坐飛機有乜所謂。（接受太空人離心訓練？）唔知畀唔畀我哋玩。」胡楓則表示不敢玩熱氣球，又笑說不拖獅子老虎：「啲獅子老虎冇牙都仲可以考慮，有牙就唔好搞我，好似佢兩個咁（曾江、謝賢）冇人性，容乜易行行吓噬一啖。」

問到腳患痛風數十年的曾江，行程會否太辛苦？他說：「唔行得咪唔行囉！話知佢，夾硬嚟點得，講明唔得就唔得，佢要求嘅我做唔到，就最多盡力而為。」