神劇《大時代》中，方家三姊妹李麗珍、吳詠紅及楊羚昨日與大仇人「丁孝蟹」邵仲衡在活動上「狹路相逢」！期間「孝蟹上身」的邵仲衡出招搶鏡，重演談情戲時突然加戲攬實珍妹腰部，再追問婚期嚇窒珍妹！

「孝蟹」上身的邵仲衡搶晒鏡，更狂問婚期嚇窒李麗珍！

戴黑超的邵仲衡High爆跳舞。

邵仲衡趁與「舊情人」李麗珍重演雨傘談情時，把握機會攬實對方「重溫」舊夢！

楊羚（左）與吳詠紅希望與舊拍檔欣賞《大》劇結局。

凌晨熱播的《大時代》劇情愈見緊湊，日前播到「方敏」楊羚跳樓自殺及「丁孝蟹」邵仲衡再派人掟「方婷」李麗珍及「方芳」吳詠紅落樓慘死等經典畫面！昨日三姊妹「復活」出席商場活動，更與仇人「丁孝蟹」狹路相逢！

方家三姊妹「復活」

現實中，四人已多年未試過一同出席活動，49歲的珍妹容光煥發依舊索爆，48歲的吳詠紅剪了短髮晒熟女氣質，而49歲的楊羚則繼續童顏，並帶囡囡上台合照。近期曝光率甚高、51歲的邵仲衡則滿場飛與台下Fans合照，更「孝蟹」上身High爆搶鏡！

大會安排四人與觀眾玩估歌遊戲及重演劇情，表現最投入的邵仲衡與珍妹重演擔遮談情戲時起初頗為生硬，主持叫他們深情對望，邵仲衡即誇張大叫被珍妹電親，到合照時更輕攬女方腰部，惟珍妹似乎不太受落！

唔知潘源良求婚

他倆互笠高帽指大家「冇咩點變」，邵仲衡大讚珍妹駐顏有術，提到有傳珍妹男友潘源良將於音樂會求婚，大表贊成的他說：「如果佢（潘源良）唔求婚我就搵佢喇！都應該啦！」珍妹則毫不知情：「唔好整蠱我喎！係就早啲單聲。（佢話有特別任務！）唱歌吖嘛！唔係唱畀我聽，係唱畀大家聽！」邵仲衡再追問婚事，珍妹說：「自己買飛睇啦！」問到會否想再合作？邵仲衡說：「佢（珍妹）肯我就咩都制！」珍妹說：「隨緣啦！可能演姊弟。」提及有否跟18歲女兒提起舊劇，珍妹說：「佢唔喺香港喎！都有講過吓嘅，但套劇仲大過佢啦！」有傳女兒與同性影親密相性向成疑，她說：「女仔同女仔影相好正常啫！」珍妹及吳詠紅難忘劇中吊威吔墮樓戲，惜最後被剪走。

談及多年不見，吳詠紅及楊羚希望集齊劇中演員如鄭少秋、劉青雲及藍潔瑛等睇大結局，惟她們已遺失舊同事的電話號碼，望記者呼籲促成約會。二人又表示出席活動前甚緊張，吳詠紅狂做Facial及跑步操弗，楊羚則笑說：「我專登食少咗飯，驚大家話我肥淨對眼！」

對於《大》劇重播迴響甚大，無綫企業傳訊部昨日表示若商場有興趣合作舉行劇集結局活動，無綫願意配合。