前Beyond成員葉世榮日前秘密返港，約會舊隊友黃家強與黃貫中（Paul）傾談Beyond合體開紀念黃家駒慈善騷事宜，身在北京的世榮昨日接受電話訪問時說：「我分開兩日見咗家強同阿Paul，敍舊之餘都有同佢哋講吓演唱會嘅構思，但係好初步，我都有信心，但有信心唔代表成功，大家畀啲時間我哋三個啦！」

世榮（中）透露為Beyond合體騷，已分別與家強（右）及Paul見面，但未有進展。

問到家強反應如何？世榮笑言自己是演講角色，指家強沒太大抗拒，但亦沒太大進度，而阿Paul則是支持，又讚他已「收晒火」：「我上咗佢土瓜灣嘅Band房，佢畫咗好多靚畫，我叫佢開畫展！（刻意同佢哋分開見面？）我哋三個自從做完Beyond演唱會（2008年）、一齊打邊爐慶功後，真係未試過三個一齊聚頭，但我有信心總有呢一日，大家不如立停火協議啦！將家駒嘅和平、包容、愛心延續畀年輕人仲好。」