莊思敏自爆近日有人自稱是其忠實粉絲，並開價十萬要求她「陪瞓」，希望能共度一晚春宵，莊思敏笑說：「最嬲係佢開呢個價，太睇小我啦，我買隻手鈪都唔止呢個價啦！」

莊思敏近日收到「粉絲」電郵開價十萬陪瞓，她形容為笑料一則。

梁琤坦言對結婚有恐懼，除非有BB才考慮拉埋天窗。

莊思敏（Jacquelin）與楊秀惠昨日在將軍澳電視城為有份主持的節目《姊妹淘》進行錄影。Jacquelin近日自爆收到一封自稱是其粉絲的電郵，起初內容正路大讚欣賞她演戲，惟後來卻露出狐狸尾巴。

睇完得啖笑

該名粉絲提出願意支付十萬元，要求Jacquelin共度一晚春宵，Jacquelin笑說：「睇到得啖笑啦！我唔識佢，唔知佢係邊個！未試過有人咁直接開價，透過啲中間人問價就試過。不過最嬲係佢開呢個價，太睇小我啦！我買隻手鈪都唔止呢個價啦！（想知佢係邊個？）唔會！我又唔係有興趣，無謂同佢爭持落去。（同公司備案？）自己喺網上都寫咗出嚟，公司都知呢件事，得啖笑啦！」

梁琤怕結婚

而昨日錄影的《姊妹淘》內容講述婚姻問題，嘉賓梁琤坦言對結婚有恐懼，因為結婚不止是兩個人的事，加上現時的年紀更加不會考慮結婚，最重要是兩個人生活開心，除非有小朋友就會有責任結婚。

而另一位嘉賓江美儀坦言與男友的關係不會因一紙婚書而改變：「結唔結婚都要努力經營一段關係，唔結婚兩個人幾好，大家仲有得揀，唔會奉旨，反而會緊張對方多啲！」