容祖兒和李克勤將於九月「合體」舉行紅館騷，提到早前有不法之徒提早洩漏宣傳海報，並疑非法兜售門票，克勤希望在下月16日開賣前不會再「漏出來」，又呼籲歌迷趁開賣當天是祖兒的生日，可以買飛當禮物。談到另一輯海報，克勤大爆祖兒將「水着」示人！問到祖兒有否被「水着」嚇親？她笑言最驚嚇是拍攝時「浸冷水」，克勤即說：「搵咗呢個場地好耐，終於搵到個暖水池，點知去到落水咁凍嘅，佢哋先問係咪要開暖水，咁煲煲水都幾分鐘，何況個泳池咁大！」

雖然祖兒要捱冷拍攝，幸而最終海報效果夠靚！

祖兒和克勤大爆拍海報時的浸冷水「慘案」。

祖兒補妝都要浸住水，睇見都辛苦！

克勤透露到現在已有一千個構思，希望今次合作可以給大家平日見不到的面貌，不過當祖兒笑說可以八日八個Rundown時，克勤即暗笑校長譚詠麟：「你嚇死監製，又記死我，平時同記憶力差嘅人做騷做得多，連自己嘅記憶力都有啲衰退。」