新一代「宅男女神」陳瀅（Jeannie）除了演技了得外，對於瑜伽亦有一手。瑜伽不但令她操出完美Body，更獲得不少人生契機，對於瑜伽尚算半個專家的她更即場示範一招半式，與各位絲打分享瘦身心得！

樹式（Tree Pose）
作用：緊實胸背肌肉，有助矯正脊柱側彎及提升平衡力。

眼鏡蛇式（Cobra Pose）
作用：加強腰椎及四周肌肉、刺激腹部和骨盆腔器官。

門閂式（Gate Pose）
作用：伸展軀幹兩側和大腿後肌。

站立拉弓式（Standing Bow Pose）
作用：促進血液循環、靈活下盤和提升專注力。

三角伸展式（Extended Triangle Pose）
作用：有助紓緩頸部及肩關節疼痛。

舉手抓大足趾式（Extended Hand To Big Toe Pose）
作用：能夠強化腿部和腳踝、伸展腿後肌肉和提升平衡力。

排毒瘦身

陳瀅早前憑無綫劇《女人俱樂部》和《四個女仔三個BAR》人氣急升，進佔女神排行榜的前列位置，但原來女神並不像維納斯一樣從泡沫裏誕生，而是長時間做瑜伽打造而成。她透露在加拿大溫哥華讀書時才第一次接觸瑜伽：「因為嗰陣係肥妹仔，對自己嘅信心冇咁高，聽聞做Hot Yoga會好易瘦，因為排好多汗同埋毒素，嗰陣中學已經開始做，都有七、八年！」她又指現時雖未必有空持續做瑜伽，但都會盡量抽時間去做，皆因這是有效的瘦身妙法：「我會Feel到做完一堂真係會成個人嘅水分排出晒，成個人輕咗，腰位、手臂、腳都冇咁腫。」身形弗爆的她更揚言要減多5磅才算滿分：「女仔永遠都覺得自己可以再瘦啲，我想瘦多5磅。（5磅好易！）好難，因為我好為食，鍾意食嘢，同埋近排胃口大開，成日都諗住食嘢！（瘦到好似陳凱琳咁？）咁我呢一世都做唔到呢樣嘢，佢本身個骨架係細，但係我骨架又粗又橫，我有佢咁瘦會好怪！」

能量增值

Jeannie表示做瑜伽除了能有助瘦身外，還令她長期處於「作戰狀態」：「近排做運動都做多咗，拍劇要做動作，要Keep番個Energy（能量）喺度，發覺冇做運動一排，突然間叫你去拍打戲會好攰，同埋會腰痠背痛。就係咁覺得自己好唔Fit，所以就開始做番瑜伽。（身手靈活咗？）會呀！因為瑜伽會用你個Core Enegry，即係腹力。同埋其實好多動作都要靠個腹，所以拍打戲、做動作起嚟都有力啲。」除了瑜伽外，經常跳跳紮的她亦喜歡打羽毛球、游水和跑步：「我覺得跑步好困難，啲人成日話一分鐘好易過，但係喺跑步機上用Level 10跑一分鐘係好難過，跑步我諗只會跑15分鐘就會去舉啞鈴。（做瑜伽難啲？）係，要好有耐性唔急得，平時做嘢可能要好快、好急咁做每件事，但瑜伽係訓練你慢慢嚟，同埋佢會Push你個Limit，一個Pose做得幾靚都好，永遠都仲有空間可以做得更好，呢種諗法亦都影響到我做人態度。」

消耗體力

Jeannie坦言不少人對瑜伽有所誤解，因為這種運動看似慢條斯理、運動量少，但事實上非常講求體力：「我初頭做瑜伽會怕悶，因為唔係好劇烈，又或者大動作，係好慢好溫柔，但係都可以令你心跳得好快，做瑜伽雖然係慢，但佢消耗嘅卡路里同跑步差唔多。」現時的年輕人都喜歡三五知己結伴做瑜伽，問到會否帶異性一齊玩，她笑說：「我試過掹我細佬去，佢覺得好尷尬，因為大部分嘅男仔都係除晒衫冇着上身，淨係得條好緊嘅下身褲，所以佢唔跟我去，但係我好多男仔Friend係專登去（目及）女，因為啲女仔全部都着到好緊，出晒汗個身濕晒。（（目及）你？）唔係呀！佢哋自己去啫，我都講笑咁講我去親佢哋就唔好嚟！」

後記：熱身拉筋不可少

其實瑜伽和其他運動一樣，事前熱身都非常講究，但Jeannie未拉好筋便立即做瑜伽，令關節「啪啪」聲，對於自己「扮勁」，她感到非常不好意思：「我覺得重要嘅係運動前同運動後都要做好熱身同拉筋，如果你拉筋拉得唔足夠，第二日就好容易會受傷同痛。」