《我愛發哥》第五集昨日播出，今集宅男女神岑麗香問影帝周潤發到街市買餸會否講價！發哥搞笑地表示買嘢唔使畀錢噃！又讚香香珠圓肉潤，氹得女神香香暈得一陣陣，即時表示隨時上門為發哥炮製甜品！

當女神遇上超級男神，會點？睇香香個表情就知要幾冧就有幾冧啦！

發哥發嫂夫妻恩愛，香香羨慕到呢！

折都唔攞
九龍城街坊當正發哥係自己人，難怪發哥買餸人人畀面，食嘢唔使畀錢！

幾時煮嘢畀你食呀！發哥。

香香：好細心好識氹老婆

大家知唔知點解，發哥發嫂結咗婚近30年，都係咁恩愛，同埋冇緋聞呢？因為每次發哥出席公開場合都會帶埋佢太太，第二就係佢好細心，知道發嫂好鍾意食西貢車仔麵舖嘅車仔麵，所以專登搭車入去買畀佢食，真係好細心，好識氹老婆！

香香：發哥我鍾意你成日搭地鐵，又走去街市買餸，呢啲係真人做嘅嘢，多謝你！

發哥：真人做嘅嘢？（台山話）阿香香，我感覺呢！你就加拿大返嚟，嗰邊台山人多，我覺得你都似係台山人，我唔知你係台山、開平定恩平吖！我去加拿大都見到好多台山人，我拍《秋天的童話》去紐約嗰時都有好多台山人，所以我對台山啲妹頭有感情，我見到你珠圓玉潤，都似係台山嗰隻。

成個九龍城都係我開

香香：發哥！我想問你平時去街市鍾意買餸，人哋會唔會畀折頭你？如果唔畀你會唔會講價？

發哥：使咩攞折頭？直情攞啦！我開！成個九龍城都係我開！佢哋唔敢問我攞錢嘅，我當自己屋企，當自己開舖頭，折都唔攞，佢哋會話隨便攞，唔使錢！我係土霸嚟！

你煮啲甜品好鬼好食

香香：發哥！我想問你成日搭地鐵，我去邊個站先可以撞到你呢？

發哥：有人問過喎！通常我過海就屋企行過去太子先，如果我去大嶼山行山，就梗係坐東涌線，如果九龍塘轉車，香港線係多人，我就會坐觀塘線，喺鰂魚涌嗰邊過海，所以你要撞我，其實幾萬分之一，好難好難，你又唔知我幾時去！講開又講，你同麥包個節目我有睇，你煮啲甜品，好鬼好食！（台山話）幾時煮過我吃話？香香！

香香：發哥！我唔係台山人，但我來自加拿大，有好多山，我帶你去行山！仲有，香香會隨時煮甜品畀你同你太太吃！我今日仲學咗一樣嘢，我會去街市直情攞，我唔會問人拎折頭，我直情攞呀！跟住我會去你屋企，煮甜品畀你哋食！