2007年落選港姐鄭瑩瑩早於2012年離開無綫，出外「闖世界」兩年的她最近回歸幕前，希望打響知名度為自己的公關公司做生招牌！

側面看似平平無奇的Destiny，正面原來甚有睇頭！

淡出娛圈數年，Destiny依然Keep到好身材。

Destiny曾於2007年參選港姐。

曾擔任味之天使「橙」的2007年落選港姐鄭瑩瑩（Destiny），於2012離開無綫，打算闖出一片天！她說：「嗰陣喺度諗，咁大個女都未試過喺出面打工，對公關行業又幾有興趣，不如試吓喺出面闖！」離開無綫後擔任公關兩年的她，累積經驗後便與友人合資開設公關公司，實行搵錢大計！

望復出做主持

Destiny表示公關公司原以財經為主，後來因她是藝人的關係，不少娛樂公司亦有興趣與她合作，將活動的公關工作交由她主理，令她有「復出」之意，她說：「其實我對拍攝好有興趣，尤其係主持工作！」早前替nowTV拍攝旅遊節目後，她更覺技癢，亦認為復出娛圈有助公關公司的發展。

年過30先結婚

公司成立只是短短半年，已達到收支平衡，甚至有微利，令Destiny更有信心。提到同屬味之天使的張韋怡已嫁為人妻，陳宛蔚亦即將下嫁導演男友錢國偉，問到有否為自己定下婚期？Destiny說：「我冇喺娛樂圈都兩年，依家公司又啱啱起步，所以都冇諗過呢方面，順其自然啦！我想做到事業有成先！起碼過咗30歲先啦！」