男新人高峰早年曾在歌手龍小菌的所屬公司擔任幕後人員，原來有一次小菌因病無法工作，勞煩高峰頂包，最厲害是冇人發覺！

龍小菌自爆蒙面時代曾搵高峰頂包，成功瞞天過海。

小菌與高峰默契十足，擺甫士時合拍度攞滿Fun！

歌手龍小菌與新人高峰原來早已認識，當高峰還未出道時，曾在小菌公司當幕後人員，當時更曾救過小菌一次，代她上陣做訪問，小菌說：「好記得當年我仲蒙面嗰陣，喺九展做完兩場演唱會之後，第二日病到落唔到床，但嗰陣我要做訪問唔取消得，結果公司商量後就叫高峰扮我，因為反正係蒙面唔見樣，而我哋又差唔多高。（咁你都要出聲喎？）當日同咗個記者講我講唔到嘢，之後電話再問番。」

街頭騷飽受雨打

代小菌出征的高峰，回想蒙面時最辛苦，因空氣並不流通，他說：「入面抖唔到氣，好辛苦！事前又要睇番佢啲相，睇吓佢點擺甫士。」談到兩人昔日點滴，高峰笑言必是當日在旺角唱歌的時候：「好記得之後喺旺角開街頭音樂會，開足廿場，點知超過一半場次都係落雨，仲有幾日係打風添！」小菌聽罷亦有感而發：「其實佢哋（指高峰）先最辛苦，日曬雨淋又要搬搬抬抬。」她又讚高峰寫得一手靚字，音樂會的大字報由他一手包辦！