Dear Jane排隊做老襯

樂隊Dear Jane主音Tim去年十二月與楊洛婷在夏威夷拉埋天窗，成為隊中第一位人夫，Tim表示結婚後身邊不少人也向他「催生」，但他決定不會「為造而造」：「慢慢啦！要睇時間，老婆好忙。我覺得未必要Plan得咁緊，見到有啲人好辛苦，例如計劃晒嗰個月晚晚都要『造人』，呢啲天意嚟嘛！」

成員試水溫

Tim選定在夏威夷進行人生大事，皆因他從小在當地讀書，又記得夏威夷有間粉紅色的酒店，正合老婆心水。

Tim成功搶閘做「老襯」後，各自與女友發展穩定的其他三位成員，亦表示有結婚衝動：「睇吓Tim得唔得先，睇吓呢條結婚嘅路Work唔Work先。」

成員Jackal在Tim的婚禮上，力壓其他恨嫁姊妹，搶贏花球，即被隊友睇好「好事近」，他說：「我坐最後一行都接到，畀姊妹團話我同女人爭花球，其實我都想結，但依家未有計劃。」

相反，Howie則表示暫時未有結婚打算：「我驚結婚，可能我個人幼稚，從來冇諗過。（女友要名分？）可能聽日唔係呢個女朋友呢！」

新碟很「傷心」

對於工作大計，Dear Jane希望今年在音樂上有雙倍產量，成功開騷答謝歌迷，又透露新碟主題是「灰色」，主要探討傷心的題材，Howie說：「上年經歷咗唔開心嘅一年，因為媽媽過咗身，所以寫啲歌自然都會唔開心。」

場地：紅磡都會海逸酒店