憑《亞洲星光大道2》奪季後簽約亞視而入行的于天龍（Sunny），起初有不少機會，但一直未能如願出碟：「喺公司學到好多，但後來製作少咗，開始成日喺屋企，唔開心冇被重用，有機會但冇畀我去試。」連約滿都冇人談續約，令他決定離開。

于天龍深信只要還有人找自己工作，就代表仍有能力。

不過，Sunny因出身亞視及仍是新人的關係，雖然外闖但乏人問津，幸好最後獲高志森相助參演舞台劇，助他脫離低潮：「嗰段日子令我過得充實，再重新寫番歌。」最後更以獨立歌手身份推出作品《啤酒與炸雞》！Sunny直言從沒放棄做藝人，不想令自己後悔。