MVG成員Ivy（周曉彤）早前單拖到泰國布吉旅行，適逢當地潑水節，慘被連番水槍「硬射」的Ivy忍無可忍即場購買「巨炮」反擊，更到動物園與老虎近距離接觸。

Ivy到布吉時撞正潑水節，入鄉隨俗買水槍見人就射！

Ivy除了在沙灘策騎馳騁外，當然不忘換泳衣享受陽光與海灘。

喜歡動物的Ivy攬實老虎合照，睇吓隻老虎幾冧！

組合MVG成員Ivy早前漏夜上網搶購平機票，成功以「五蚊雞」買得一張飛布吉的機票，決定做獨行俠遊山玩水，又透露並非首次到當地：「見有平機票咪試吓囉，點知又買到。（買得一張？）其實買咗兩張，但朋友臨時甩底，自己有諗去唔去好，但見喺香港壓力咁大，加上當地使費唔高，所以照舊出發。」

撞啱潑水節

Ivy表示落機到酒店放低行李後，步出酒店不夠兩分鐘已全身濕透：「咁啱當地潑水節，啲男男女女見我一個女仔，即圍住我用水兜頭淋，初時都冇乜嘢，之後就有少少嬲，咪走咗去買支大水槍射番佢哋！」問到手機與銀包是否「報銷」？早有準備的Ivy說：「冇！因為我會去沙灘，有帶防水袋袋住。」

睇動物攬虎

除了玩水，Ivy還一親大自然，睇動物兼攬着老虎影相，問到有否擔心危險？她說：「唔會呀！試過好多次，因為我好鍾意動物，唔驚有意外。」Ivy又首嘗在沙灘騎馬，她說：「好開心呀！當時沙灘一個人都冇，好似包咗成個沙灘，撞啱日落同出彩虹，真係一個人的浪漫。」