「兩大惡人」吳志雄與黃光亮再次發揮惡人本色，在新片《壹獄壹世界》中惡得入型入格，不過二人在現實中絕對不惡，曾坐過兩次監的吳志雄希望年輕人不要行錯路，黃光亮則希望吸納電影圈新血。

黃光亮

吳志雄

除兩大惡人外，索女崔碧珈（左）與林芊妤亦有份參演《壹》片。

吳志雄（大佬B）與黃光亮的「惡形惡相」早已深入民心，今次再為新片《壹獄壹世界》演惡人。不過，二人在現實中卻是一個好人，大佬B雖然只是客串，但超越了從影以來的演技：「去到先知拍咩，同邊個拍，冇劇本，完全靠臨場發揮，拍完嗰時全場拍手，一Take過！」。

盼勿行錯路

演出江湖片數十年，大佬B以過來人身份說：「電影係夢工場，你哋啲年輕人唔好信啲江湖片，唔想啲後生學電影入面嘅嘢，我細個時行錯路，坐過兩次監，依家可以退出江湖，做番啲生意仔，係天賜嘅機會，唔希望有後生仔行我行錯嘅路！」

傳承價值觀

而黃光亮轉戰電視圈已有一段時間，原來是因為厭倦在銀幕前做惡人，今次答應演出，希望將多年拍攝電影的經驗傳承給新演員，他說：「我提名過新人，依家我見到好多新人，感受良多，令我更有使命感。拍攝過程我會用我以前個價值觀，同佢哋討論。去完成一件事，令件事更有火花，令我有好大滿足感。」《壹》片除邀得吳志雄及黃光亮參演外，亦搵崔碧珈（左）與林芊妤加盟，惡人與索女大鬥演技。