溫碧霞近年狂吸人仔，物業遍布整個亞洲區，近日她再豪擲1,000萬港元購入東京六本木的一間頂層複式單位，放租等升值！

早前溫碧霞（左二）已到六本木收樓。

溫碧霞於六本木的物業景觀開揚。

英皇電影藝人溫碧霞（Irene）內地商演、廣告未停過，賺人仔賺到笑，投資買樓達25年的她，數月前到東京，在朋友介紹下到六本木的麻布十番區睇樓，該區為東京豪宅區，她對一個面積1,500呎、兩房兩廳的頂樓雙層複式Penthouse愛不釋手。

三年花半億三地投資

本報記者聯絡身在外地的Irene，她開心透露買到筍盤：「個盤本身要二千幾萬，大地震之後平咗，依家一千萬買到，真係好抵！日本（日圓）依家咁低，都想趁低吸納，間屋暫時放租，每個月有成五萬租金收入。」又不排除於歐美置業。

其實Irene在三年內已豪擲4,800萬港元於香港、日本及峇里置業，其中於峇里島買地興建如度假村的Villa，她自言是其Dream House：「細個住嘅石屋對住海，呢度都一樣，要嚟自住嘅！」去年她亦在港的「天晉」買樓送兩位姊姊：「因為調景嶺係我長大嘅地方，有好多回憶，諗起童年，懷念父母！」她表示因經典劇《火玫瑰》的角色「海潮」帶挈，三年內在內地接拍逾65個廣告，廣告價升至80萬人仔，商演價則40萬。忙爆的她近日才有空到東京收樓，更抽空探望已出家的前經理人兼助手，又計劃將各地的物業都留給養子。

任達華推介倫敦樓

另外，圈中著名樓神任達華對於Irene在各地置業表支持：「非常好！如果佢想再投資，我推介倫敦樓，因為喺金融中心，升值潛力好好，我有物業喺嗰度，五年前到依家升咗三、四成。」