第四集《我愛發哥》昨日在《東網巨星》播出，人氣急升的張繼聰向偶像周潤發求教，但最搞笑的是，發哥竟只顧望實阿聰副眼鏡，笑他是「老花聰伯」！之後發哥狂讚阿聰有前途兼腹肌結實，受寵若驚的阿聰直言被電暈！

發哥大讚張繼聰前途無可限量。

阿聰隔住個Mon都大為感動！

張繼聰的「老花聰伯Look」逗得發哥樂不可支！

張繼聰：我係發哥影迷，之前喺電視台拍劇會問台前幕後嘅老前輩，打探吓佢當年喺電視台拍劇嘅神髓同往事，得到嘅係一致嘅讚賞，我好鍾意佢可以令個拍攝氣氛好開心，每個人喺開心同冇壓力嘅情況下發揮，呢種先係最一級嘅演員！因為除咗自己做得好，可以令身邊人更出色，曾經「船頭尺」有句對白成為咗我嘅座右銘，就係「自己Happy咪得，使乜理人？」

發哥：呢個又唔得嘅，點可以只係自己Happy，側邊啲人好辛苦？一定要令人哋Happy，自己先Happy！喂！唔好講咁多，你眼鏡做咩事，花得咁淒涼？依家有鏡片防UV嘛！我睇唔到你眼睛，眼花花喎！你幾歲呀？咁後生，搞到自己咁樣，好似阿伯咁，阿聰伯，你搞咩呀？好！你鍾意船頭尺你咪船頭尺囉！謝安琪咪鍾楚紅囉！你問我做咩？你咁英俊有型！仲有，你喺TVB成日撈我啲底呀？我好多Friend喺入面，你唔好咁多嘢講呀！有咩我叫佢哋郁你！

張繼聰：依家會唔會仲遇到唔開心事？如果遇到嘅話會點樣處理同面對？

發哥：我哋成日話，人生不如意事十常八九，剩番一，你嗰一都唔開心？老虎都要開心，你吸到一啖氣都喺度，又唔使錢嘅，活得開心快樂就係每一啖空氣，有咩唔開心呢？唔會！

張繼聰：拍戲收到角色時會做啲咩事前準備工夫呢？

發哥：呢個就簡單，我其實好仰慕你，成日見你晒朱古力，啲朱古力又唔溶！舊舊都咁實，呢啲已經做晒工夫啦！我睇你好多戲！我封你做偶像！張繼聰，畀啲心機，做你唔死算你夠運，你套套都有，你紅得好緊要！恭喜你！慢慢捱，有排你捱！

隔Mon會男神 何其滾動！

得到發哥的神級回覆，張繼聰直言相當「滾動」（感動），更有觸電感覺：「好！今日個心其實有啲『滾動』嘅，因為好似同發哥對話咁，雖然我哋唔係面對面，我冇好多其他香港人咁幸福，可以野生捕獲發哥，但我都對住個螢光幕，發哥好似望住我咁！同埋佢知我太太叫謝安琪啦！同埋見過我嘅胴體啦！又睇過我嘅演出啦！嗰種感覺好感動，我望住個Mon，Mon嚟咋喎！望住發哥，嗰種觸電嘅感覺係第一次，我都希望有一日隔住個Mon咁樣電人，嗰個人都可以被電暈咗！」