昨日《東網巨星》播出的第三集《我愛發哥》，輪到女神級花旦鍾嘉欣與影帝周潤發交流一番，貪靚的嘉欣BB更請教Keep靚樣秘訣，發哥竟教嘉欣玩倒立逆齡！

發哥Keep得咁靚仔，嘉欣又點可以唔向佢討教不老秘訣呢？

發哥向嘉欣親授Keep靚樣秘訣之餘，更大讚她靚女，冧得嘉欣頻頻甜笑！

嘉欣：我愛發哥，因為我睇過發哥訪問，當中話過佢會將所有遺產捐畀慈善機構，好佩服你！

發哥：就係咁咋？嘩！呢樣嘢唔知等到幾時，依家科學咁昌明，啲人分分鐘110幾歲，50年後大家都唔知發生咩事，到時先再講啦！

嘉欣：發哥！點解你可以一直Keep得咁靚仔？

發哥：你講嘢呀？呢個世界有樣嘢叫地心吸力，呢啲咁嘅地方（下巴）會下墜，日日咁扯，我又唔識倒豎葱，如果我有個朋友識教我打番兩咀玩倒豎葱，可能都會後生二、三十年，不過唔去喇！我驚我一整上去就腦沖血，你靚女啲！講開又講，有一次畀你嚇死我，你畀人整蠱嗰次，你真係好逼真，逼真到嚇死人，啱o架喇！Keep住呢個感覺，以後做戲都係咁！

男神也有可愛處！

嘉欣看着發哥的回覆時，一直表現得甜絲絲，事後她說：「好可愛呀！發哥！多謝！多謝你有留意我，我會繼續努力呀！」