無綫藝人羅鈞滿與新聞小花張文采拍拖四年，前年他揚言要四年內與女友結婚生仔。豈料四年未到，日前就被本報獨家拍得他於尖沙咀夜場連獵兩女，一王兩后夜蒲飲嘢，完全當女友冇到！

羅鈞滿於尖沙咀夜場連獵兩女飲酒密密斟，睇嚟要同女友解釋吓！

羅鈞滿捉實長髮女施展冧笑，成功勸掂伊人留低！

長髮女與羅鈞滿邊飲酒邊咬耳仔談心，毫不避忌。

羅鈞滿於無綫歌唱比賽節目《星夢傳奇》躋身五強而廣為人識，其後備受無綫重視，除主唱多套劇集主題曲外，更有份主持《勁歌金曲》。他與無綫新聞小花張文采拍拖四年，一直非常低調，甚少於網上晒恩愛。成功溝掂新聞小花的他，當然惹來不少港男妒忌！不過，日前他卻被本報獨家拍到背女友於尖沙咀諾士佛臺一間酒吧，肆無忌憚連獵兩女！

捉手仔勸留低

當晚戴眼鏡的羅鈞滿打扮斯文，單拖與一名身穿露肩裙的長髮女飲酒，他們點了半打啤酒，非常飲得。起初他們純粹吹水，最多只是咬耳仔傾偈，未有太多身體接觸，豈料長髮女突然發難想離開，羅鈞滿見狀即捉實長髮女手仔，施冧功叫對方不要走。經過一輪拉扯後，長髮女被氹得笑晒口並決定留低，於是他們繼續飲酒談心。

隊夠一打啤酒

未幾，另一名身穿露肩裙的長髮女二號到場，見半打啤酒不夠飲，羅鈞滿即再叫半打，一王兩后齊齊吹水飲酒，似乎他無懼被認出的風險，毫不避忌。把口口浪過油的羅鈞滿逗得兩女笑逐顏開，未知玩到興起的三人會否有下場？