范振鋒與太太李思欣、寫真模黃榕、仙樂都及前亞姐筱靖等昨日到九龍塘出席活動，提到早前的打架事件，阿范表示傷已痊愈：「雙方律師傾向和解，依家傾緊。（之前話搬？）睇咗好多樓，但風水師話麻麻。（阿Bob林盛斌話幫你？）佢有十幾個單位，話睇啱就賣畀我，我發現佢開價貴同區成截，離晒譜！明幫暗整蠱！佢話：『風水屋嘛！』我回佢：『咁你生3個都係女嘅？』」對此，Bob昨晚回應：「佢唔想生女，我想生女呀！我冇嬲，佢講笑啫，自己友，冇所謂。之前佢睇啱嗰啲單位租咗畀人，我介紹咗啲地產朋友畀佢，睇吓幫唔幫到手。」

范振鋒嫌老友阿Bob出售的風水屋比同區的貴，唔知老婆李思欣又點睇呢？

Bob

黃榕自爆拍攝寫真時，被男攝影師嫌對腳擘得唔夠大。

而黃榕則以低胸裝出席活動，她說：「呢輪影緊寫真集，男攝影師話：『你挑逗我！』要我影相都要畀戲，又叫我擘大對腳，仲話：『你未影過性感相咩？影咁多年都係咁！』但我已經擘到好大，好尷尬！之後會喺水底影全裸，但我唔識游水。（咁搏命？）我見都咁上下年紀，仲有32C、23、33身形，好值得驕傲！」