新進女歌手陳綺雯自言因為怕麻煩，較少親手炮製愛心甜品給男友，今次她自製馬卡龍，不過遺憾未遇到適合的另一半。她最欣賞音樂才子，笑言身邊不少有才之士，定會多加留意！

Aki製作馬卡龍有板有眼，樣靚之餘煮嘢一樣掂！

先把蛋白打起至三成，將沙糖分開三次加入已打起的蛋白。

然後加入杏仁粉和糖粉攪勻。

將攪拌好的材料放入唧袋。

在紙模上唧出圓形，最後放入焗爐160度，焗15至20分鐘。

笑言怕麻煩的陳綺雯（Aki）較少親手自製禮物給另一半，今次特意處女下海，獻出第一次試製馬卡龍：「之前都少整呢啲畀男朋友做情人節或者生日禮物！」她又表示入行以來的情人節都在工作中度過：「就算放工都會搵屋企人，或者朋友一齊見面玩吓就算，以往有男朋友嘅情人節我整過朱古力，不過太麻煩喇，搞到屋企立立亂！」雖然今次精心炮製的馬卡龍未有對象可送，但Aki指身邊女性朋友都愛吃這類西方甜點！

我是精分女友

雙子座的Aki笑言是有多重性格的「精神分裂女友」：「我對住男朋友都唔會話成日嗲佢，可能因為我係雙子座嘅關係，應該唔止雙重性格，可能多重添！或者有時我會難得好嗲好嗲，亦都有陣會好Man咁講嘢，令到男仔同我拍拖會好似日日換咗女朋友咁！」她最討厭貪錢的女人：「公主病就應該冇咩，我自己都唔知呀！哈哈！平時得我一個嗰陣都幾獨立嘅，但如果有人畀我依靠，都會幾鍾意倚賴男朋友。」

最愛手製禮物

平日少有親自製作禮物的Aki，卻最愛收到男友花心思的自製禮物：「我都希望有男仔親手整甜品畀我食，對我嚟講心意遠遠比物質重要！最令我感動嘅試過收1,000粒自己摺嘅星星，我覺得呢啲對男仔嚟講好難得。」想追求Aki的男士真要「偷吓師」，花多點心思了！她坦言另一半需要體諒她的職業：「佢揀得我都係因為佢唔介意，將來有家庭嘅時候會不會怕兼顧唔到，我就覺得到時要再同另一半溝通。」她又指會盡量避免在圈中找男友：「但如果真係遇到一個啱嘅人，思想成熟又夾到嘅話，佢做啲咩其實我都冇所謂！」

如何炮製馬卡龍？

糖　粉80g

蛋　白40g

沙　糖20g

杏仁粉50g

糖　霜10g

周董！理想型！

講到選擇理想對象，Aki有明確的目標：「多數鍾意有音樂才華嘅男仔，好似周杰倫咁，我鍾意咗佢十四年！依家我身邊都有好多喺音樂上好有天分嘅男仔，我都有留意吓佢哋，哈哈！」喜歡小朋友的她想30歲前嫁得出，生育下一代就等「事業有成」時再考慮：「想喺事業方面發展得更好啲再去諗，暫時未有一個對象係我好有衝動去結婚，希望不久嘅將來會搵到啦！」