無綫神劇《大時代》個個演員演技精湛，劇中每幕經典場面都動魄驚心。在劇中與「方展博」劉青雲力鬥「丁蟹」鄭少秋的林保怡坦言，飾演「陳滔滔」是個大挑戰，因為當年他加入無綫僅兩年，監製韋家輝已委以重任，他至今仍難忘知遇之恩。談到青雲，他即「滔滔」不絕：「我同佢嘅戲最多，不過拍呢套劇時唔係最熟，當時佢同啲女仔，好似藍潔瑛、郭藹明Friend啲，之後幾年大家先慢慢做朋友。記得有場戲我哋拍到第二朝，佢同我捱到5、6點，佢已經拍晒可以走先，當時雖然唔算熟，但佢臨走前都問我食唔食早餐，真係好好人！」

林保怡一提起經典劇《大時代》即「滔滔」不絕，難忘當年的拍攝點滴。

讚青雲嫂好戲

青雲與郭藹明（Amy）是圈中模範夫婦，保怡認為Amy若非早嫁青雲，演藝事業的前途定必無可限量：「佢咁快嫁畀青雲係好『浪費』，咪誤會，佢哋天生一對，但拍《大時代》時，我已經發現佢係純用直覺演戲嘅天才型演員。我之後同佢喺另一套劇《奇情小男人》有更多對手戲，發現佢嘅演技係與生俱來，如果唔係咁早嫁畀青雲，可能已經攞影后！」保怡對於江毅叔亦印象深刻：「當時我仲係新演員，有人話江毅叔惡，好有要求，背漏一句都畀佢鬧！劇入面除咗青雲外，我同佢對手戲最多，惟有背足對白一字不漏，好彩成功過關，佢冇鬧過我！」

自薦再演「陳滔滔」

他又自言近年晚上11時便睡覺，但知道《大》劇熱播後，即使捱眼瞓亦煲劇睇「Live」：「深夜一定追睇，因為好多細節都唔記得，有種魔力令你溫故知新。有人問我點解《大》劇重播都咁收得，依家仲拍唔拍得番同樣水準嘅劇？我相信真係要有老闆肯花錢Group番台前幕後嘅精英至得，如果真係開電影版，要我做番『陳滔滔』，要我半年淨係為《大》劇開工都願意！」

此外，保怡近年到內地發展，知道內地電視台出手闊綽，曾出動銀彈及禮物攻勢，但他從未收過禮物，強調所有東西都是靠個人爭取：「我覺得拍戲唔係咁樣，要自己賺錢買番嚟先開心。除咗粉絲送啲小禮物，一切要靠自己爭取，要用心演每個角色，求求其其一定唔得！」