鍾鎮濤（阿B）與女兒鍾懿早前為內地節目《中國爸爸》合唱主題曲《爸爸，我來了》，鍾懿和鍾幗又獲邀參加親子真人騷，但阿B笑言擔心湊女辛苦而推掉：「我覺得要擺多啲時間讀書，佢鍾意唱歌同上台，但唔係拍嘢。」在旁的鍾懿卻急急否認：「我鍾意拍嘢！（想做歌手？）都想，但鍾意拍戲多啲！」她又透露客串電影《東成西就2011》時，被片中的鬼怪嚇得尖叫狂奔，因而不欲再拍恐怖片，反而有興趣拍《小飛俠》（Peter Pan）在空中飛，阿B即笑說：「吊吓（威吔）你就知味道，以為好好玩呀！」

阿B又大讚女兒的歌藝達職業級水準：「佢啲音好穩，睇到佢就諗起自己細個記歌詞好快，依家慢咗係畀譚詠麟害，周圍都擺晒電視提示，唔使記！」他又指乖女由5歲開始儲下的歌曲已夠出大碟，會靜待適當時機與大家分享。