曾拍荷里活大片《變形金剛：殲滅世紀》的內地女星趙茜、恒生新抱何倍倩及周國豐伉儷等前晚出席香檳晚宴，趙茜表示出席只為練酒量：「酒量好差，飲一杯就醉，飲醉酒時仲會不停笑，啲人以為我有病，哈哈！飲香檳都可以，可趁今晚練吓酒量，但有啲白酒同啤酒就會敏感。（試過畀人逼飲酒？）試過一次喺內地出席活動，啲人以為我好飲得，經理人已經幫我擋駕，最後都被迫飲咗一杯先走得，點知十分鐘就醉咗！（拍荷里活戲時有類似經驗？）遇見嘅外國人都好識尊重人，未曾試過！」

身穿露腰連身裙的趙茜，自爆酒量甚差。

反觀何倍倩飲酒只會面紅，她奉勸女仔出外飲酒要加倍小心：「千祈唔好將甜酒當利賓納嚟飲，細個屋企人有畀我試飲少少，女仔容易飲醉好易蝕底，我可能都會畀大仔試少少，等佢保護自己！」