日本女子組合SKE48成員大場美奈、高柳明音和江籠裕奈前日來港辦握手簽名會,大晒廣東話和粉絲打招呼,可惜發音麻麻,令人聽到一頭霧水,她們又識做地即場將簽名毛巾和手帶贈粉絲,惹來起哄!

成員江籠(左起)、高柳和美奈大跳可愛舞蹈,跳到露晒「底」都唔介意。

有女粉絲穿上SKE服裝與美奈合照,夠晒心思。

握手會現場有大批粉絲排隊,等候與偶像見面。

AKB48的名古屋姊妹組合SKE48前日派出三名人氣成員大場美奈、高柳明音和江籠裕奈來港於西九龍中心舉辦握手簽名會,吸引約300名粉絲捧場,首次來港的美奈以廣東話自我介紹,而前年曾來港的高柳則說:「好高興嚟香港再見到大家。」可惜發音麻麻,令人聽到一頭霧水,江籠就透露此行除是首次來港外,更是首度出國,因此大感興奮。

睇夜景吔山竹

高柳透露大前晚到埗後大歎地道菜和睇夜景,熱愛水果的她一嘗日本罕有的山竹,大讚美味,又自爆對攝影有興趣,對於粉絲大多拿專業相機感到驚訝,亦識做在介紹名古屋時叫粉絲要去SKE劇場睇公演。至於美奈則想試坐開篷觀光巴士,但因今趟時間不足而未能如願,江籠則希望下次能整隊SKE來港開騷。

粉絲奇裝突出

抽獎環節上,她們將簽名毛巾和手帶贈粉絲,其後唱跳三首Hit歌更唱到起飛腳奉旨露打底褲,完場時以廣東話講多謝。簽名會上,不少粉絲以浮誇衣着吸引偶像注意,有女粉絲穿上她們的歌衫上陣,亦有男粉絲扮成動漫人物。

另外,近日日本多間新聞社預測今屆AKB家族人氣總選冠軍花落誰家,現任一姐渡邊麻友卻未獲投票,而柏木由紀和高橋南等被睇好有望做一姐。此外,峯岸南日前錄影時不慎受傷,前日上載頭腫嘴腫的照片。