「山系女孩」李曼筠 潮裝遠足

李曼筠向來予人斯文優雅的感覺，初時以為她是零運動之人，誰知近年她深深愛上行山，更成為生活中一項重點運動！她透露首次行山是在2011年：「我嘅山齡唔係好耐，第一次行係喺2011年，到依家為止都係行咗4年，但真係一次愛上，我好記得初次行山嗰條路好靚，雖然好多斜路，要行中長時間。（行幾耐？）行咗4個鐘，但沿路見到啲山水好清澈，左邊係山，右邊係海，個環境好似跳出咗香港咁。見到水清沙幼，真係咩攰都抵銷晒，幾攰都唔係問題，成個人好似遠離煩囂一樣，因為行山過程中可以欣賞到好靚嘅風景，所以真心愛上了呢項運動！」她隨後又表示行山的確有點難度，故奉勸大家切記以下幾點：「因為自己唔係行得好多，又唔係專業行山人士，所以真係唔好揀太難嘅路線嚟行，老土都係咁話，一定要由入門版開始，唔好一嚟就挑戰越級難度，真係有危險性！」

老少咸宜 唔會過時

Maggie坦言以往行山總給人年老或退休人士的印象，但其後發覺此觀念已過時，因行山絕對可成為年輕人的新潮流：「以前一話行山，個人就好似老咗幾倍咁，但依家年輕人只要拎住部相機，甚至手機去行山，配上合適嘅潮流型格服飾，即刻可以打造一個潮流趨勢！（你有咩服飾好建議？）做運動首要一定係以舒服為主，例如秋涼嘅時候，可以着件打底貼身背心，再加件衞衣，又或者鬆身T-shirt加件Zip Up（拉鏈外套），咁就夠晒通爽舒適，記得衞衣要薄，同埋要淺色，會冇咁吸熱。」她又極喜歡有小口袋的衣服：「因為我好鍾意食糖，有袋就可以袋住啲糖，令自己保持精神，仲有記得飲水要慢慢飲，唔好咁大啖。」行山雖然要輕便，但她強調要記得攜帶相機：「因為風景好靚，大家唔好錯過美好事物，電話係影到，不過始終相機質素好啲，同埋會影得Wide啲！」

至Hit配搭 護肌有法

Maggie坦言就算運動都以美為主，還分享第二套喜愛的行山服裝配搭：「驚熱着背心嘅話，記得點都要加件外套，因為可以遮住個膊頭，避免曬傷，熱可以除嚟披住，重點係唔好曬到肌膚，同埋會戴帽嚟擋吓太陽，減少出斑機會。而我行山有時會選擇孭腰包，方便又好睇，所以話行山真係可以做到好新潮，雖然我嘅講法可能同啲專業人士有分別，但行山都係純粹想放鬆個人啫，個人靚啲都開心啲啦！」她又不忘提醒有興趣行山者必須穿緊身長褲，以免讓叢林的樹枝刮傷！

後記：節食減肥？傻的嗎？

Maggie自爆很愛大吃大喝，以往曾嘗試瘋狂節食減肥，但自從愛上行山後即驚覺原來運動才是最有效的Keep Fit方法：「我係飯桶嚟！好鍾意食飯，但我依家唔會再唔食嘢嚟減肥，只會一有時間就去行吓山，希望保持到一星期行一次，我發覺咁樣先係瘦身嘅治本方法。」

潮裝A

元素：衞衣＋背囊

背囊：行山裝備必須齊全，指南針、地圖、水、乾糧......要將之帶齊之餘又要方便，必須孭上一個背囊，這樣便萬無一失！

衞衣：衞衣必須要薄、淺色及闊身，既不會吸熱又通爽！而有小袋設計的衞衣亦可讓貪吃的Maggie放些糖果呢！

潮裝B

元素：帽子＋背心＋外套

帽子：帽子的作用是遮擋太陽，避免曬傷皮膚，減少出斑機會！

背心：

若覺得着T-shirt太熱，背心是一個不錯的選擇，但仍要以淺色為主，避免吸熱！

外套：

對於行山人士來說，外套的作用很大！有時香港早晚溫差大，日間較熱，晚上則較清涼，故外套不但可以保暖，還可以當披肩披着，避免膊頭被陽光曬傷，又或繫在腰間亦是一種時尚！