徐子珊昨日宣傳新劇,期間黃光亮拋籃球打中馬德鐘手上的咪,再撞向旁邊子珊的頭和鼻,令她痛到喊,更揚言要黃光亮養埋下半世!

大合照時,黃光亮把手中的籃球向後拋。

馬德鐘的咪高峰被籃球撞到飛起,正面擊中子珊。

子珊痛到眼濕濕,事後她展示傷勢(下圖),真係又紅又腫喎!

黃光亮抱起張名雅射波,可惜射極都唔中。

藝人徐子珊、馬德鐘和黃光亮等,昨日為劇集《以和為貴》到荃灣區一間中學打籃球宣傳。大合照期間,前排的黃光亮將手上籃球向後拋,打中後排馬德鐘手上的咪高峰再撞向旁邊的徐子珊,徐子珊頭和鼻樑中招,痛得用手掩面並流出眼淚,需到後台休息。

「包養」下半世

約十分鐘後,徐子珊帶傷走到黃光亮身邊問責,並作狀向他揮拳,子珊說:「冇喊,標眼水啫。(擔心留疤?)敷冰應該冇事,有咩事要佢養我下半世!(咁重口味?)三餐包住宿咋,冇其他嘢。」而黃光亮則笑說:「冇咩好內疚,我係代罪羔羊,經過調解員分析後係冇人有錯。(佢話要你養一世。)睇吓佢一餐食幾多錢啦!(可能毁容?)毁唔毁佢都係咁上下。」

李思捷考慮戀黃心穎

同場的港姐張名雅被黃光亮抱起射球,她表示不覺尷尬,對於在劇中有破格性感演出,她說:「配合角色。(接三點式泳衣騷?)冇問題,公司安排。」而李思捷被問到與黃心穎的緋聞,問到有否發展機會,他說:「一定有,冇嘢冇可能。佢靚女、青春、有才華,做朋友一流!(做情侶呢?)都可以考慮。」

另外,馬德鐘事後出席另一活動,提到黃光亮自稱「代罪羔羊」,他笑說:「唔介意食死貓。」