阿Sa：總有機會攞！

阿Sa於英皇電影《雛妓》內脫胎換骨的表現，成功擺脫偶像包袱，令戲迷驚艷。她月前更率先於《大阪亞洲電影節》「先拔頭籌」捧獎。阿Sa這段日子收到四方八面傳來的短訊支持，她非常感恩：「今次係喜出望外，去到呢個階段我平常心啦！覺得今次攞唔到都總有機會嘅，做落去點都會有個『終身成就獎』啩！」

演到睇醫生?

拍攝期間，阿Sa所面對及付出的心神並非筆墨所能形容：「要Keep住角色沉重嘅情緒，成件事好抑壓，Mani（經理人霍汶希）問過我需唔需要去睇吓醫生，咁啱呢個時候我隻狗仔離世，搞到我抖唔到氣，永遠記得嗰日係上年3月19日。當時導演問我需唔需要放假，我選擇休息半日就返去開工。」

而戲中的大膽場面成為電影的賣點之一，阿Sa認為她所謂的「裸露」，其實沒甚麼大不了：「可能喺『蔡卓妍』嚟講係好激，不過同其他類似角色比較，小巫見大巫啦！驚再講畀人笑呀！」

底線三點不露

至於哪位準影后勝算較高？阿Sa笑說：「我有睇晒啲戲，其實入圍嘅全部都好好！5個角色都不同類型，真係好難去作出比較，今次好睇評委嘅口味，攞唔到獎亦唔代表係差嘅。（一定要揀呢？）咁……趙薇啦！」

永不言休的阿Sa希望未來日子能在影壇作多方面嘗試，其底線是「三點不露」﹕「真係過唔到自己嗰關！坦白講，呢套戲幾年前搵我，我未必會接，依家就冇問題。作為演員，唔同年紀有唔同嘅變化，30幾歲同60幾歲都可以拍戲，不同階段做不同嘅事啫。」