年僅19歲的新進女星郭奕芯去年因寫真集及花邊新聞成功上位,新一年她希望全力進軍影壇,最想演繹神經質角色,形象性感的她雖然不會「為露而露」,但亦不介意為藝術犧牲:「如果導演欣賞我身形,我都OK o架!」

Dry爆的Ashina直認恨拍拖,為尋找圈外男友「出擊」!

大派冰淇淋的Ashina自認神經質,最想演另類愛情片。

勇闖影壇的Ashina,裸背上陣完全冇問題!

有「嫩口謝安琪」之稱的新進女星郭奕芯(Ashina),去年推出兩本寫真集及電子寫真集,憑標致面孔及火辣身材成功彈出!同時,她因為與盛品儒於街頭啜爆飽受壓力,年僅19歲的她直言比同輩經歷更多:「舊年係成長咗好多,比起同齡女仔係幸運,見識好多,最開心係有得拍廣告同拍戲。」

唔會收起性感

去年Ashina獲賞識拍攝電影《壹獄壹世界》,今年她計劃全力進軍影壇,問到會否繼續行性感?她說:「即將有套戲我係演一個女攝影師,冇咁性感,希望大家睇到我演技,都係一個考驗。(完全收起性感?)咁又唔會,睇公司安排同劇情需要,盡量畀大家睇到各方面長處。(裸露?)如果導演欣賞我身形,我都OK o架!裸背冇問題,底線係三點不露。」

對演藝事業有盼望的Ashina,最近不停睇戲鑽研演技,問到自覺適合演哪一種戲路?她笑言個性比較神經質,所以很想拍攝另類愛情片:「可能係一人分飾兩個性格,角色偏激啲嘅,平時我都比較多愁善感,睇戲好易喊,可能拍喊戲會好啲!」

想搵圈外男友

少女情懷總是詩,單身的Ashina直認Dry爆恨拍拖,雖未有適合對象,但首選圈外男友:「覺得同圈內人拍拖好麻煩,好易有新聞炒作,又要地下情,感覺麻麻!所以寧願搵圈外人,簡單啲,當然佢要信任我,體諒到我拍戲可能要拍親熱戲咁。」