歌手側田自去年與韓籍女友分手後，一直是「冇腳的雀仔」，沒有固定感情生活，大前日他現身台北饒河街夜市，身邊女伴換上同是「韓系」樣貌的長髮姑娘，知道女伴嗜辣，即叫店員加辣，體貼到暈！

側田發辦點菜，仲細心體貼女伴嘅口味，好Man呀！

側田的韓籍前女友曾高調現身撐男友演唱會。

自與韓籍女友分手後，側田的感情生活一直成謎，但他似乎對「韓系」長髮姑娘情有獨鍾。大前日側田現身台北著名的饒河街夜市掃小食，身邊出現一位樣貌清秀，有「韓系」氣質的長髮姑娘，全程跟到實一實。

體貼加辣

一如以往，側田戴上招牌Cap帽，在旁的長髮女伴亦只略施脂粉，打扮Casual。現場所見，側田對女伴呵護備至，又不時講笑氹對方開心，似乎相識已久，二人全程以普通話交談，你一言我一語，相當有默契。其後經過一家小食店時，側田即問女伴想吃甚麼，見女伴手指指篤向餐牌，側田已心領神會，由他發辦向店員點菜，知道女伴嗜辣，即叫店員加辣，相當體貼。

不受束縛

其實與韓籍女友分手後，側田曾表示不喜歡受束縛，雖然當時已到談婚論嫁的地步，但他暗示因對方箍得太緊才分手。然而，早前到內地發展後回港的他，曾被指身邊出現不同女伴，如今又有新歡登場，可謂艷福不淺。記者致電側田，問到當時身邊的女伴是誰？他說：「我喺台灣見咗好多朋友，冇乜嘢特別！」