有「少男女神」之稱的陳嘉寶（Anjaylia），前晚與金融才俊男友黃頌祈到中環晚膳兼見家長，席上兩人黐到實孖住玩狗，男友更公然掃她背脊，略有醉意的Anjay亦小鳥依人把頭挨落男友膊頭，場面溫馨。

Anjay（中）與男友玩狗玩到笑唔停！

晚膳期間，Anjay不時挨落男友膊頭撒嬌。

見家長期間，男友全程搭住Anjay膊頭（左），好Sweet喎！

近近年人氣急升的Anjaylia，與金融才俊初戀男友黃頌祈（Epaphras）雖然拍拖僅一年多，但Anjay早已見過男友家長，她每次提起男友總是有讚冇彈，兩人感情非常穩定。最近忙於拍攝無綫新劇《殭》的Anjay，前日難得放假，即相約男友及其家人到中環晚膳，現場還有兩隻小狗。

糖黐豆當眾掃背

席上眾人邊飲酒邊吹水，Anjay識做地頻頻與男友父母傾偈，期間更手舞足蹈，可見與男友家人感情不錯。Anjay與身旁的男友連體嬰般黐到實，更經常孖住玩狗，抱住小狗逗玩的她不時甜笑。期間見Epaphras伸手到女友背脊輕輕掃來掃去，略有醉意的Anjay亦小鳥依人般把頭挨落男友膊頭，十分甜蜜。盡興至晚上十時半，Anjay尾隨男友及其家人齊齊登上七人車離開。事後她在Instagram上載與小狗的合照。

盡心意冧「奶奶」

昨日Anjay接受本報電話訪問，她表示當日是與男友家的愛犬慶祝生日：「男友屋企當隻狗係家人，所以同愛犬慶祝生日，搵藉口一家人食餐飯。（見埋家長係咪好事近？）未，其實我經常同男友家人食飯，佢哋都好錫我，Uncle份人好搞笑，我覺得要建立好嘅關係。（行奶奶政策？）盡心意啦！」