陳慧珊（Flora）繼前日為無綫劇《波士早晨》拍外景時擺阿姐款兼黑面掟劇本後，昨日開工更拒絕做訪問，似乎無意為自己解畫，亦沒有應記者要求拍攝單人照，以大合照充數，還一臉嚴肅背向記者，要同劇演員黃智賢和李佳芯為她頻頻解畫。

陳慧珊一臉嚴肅兼起晒弶，拒絕接受訪問。

陳慧珊影完合照即走，不肯影單人相，其後更背向記者。

即使轉了尼姑造型，陳慧珊依然唧都唔笑咁款！

陳慧珊與黃智賢、李佳芯及洪永城等影大合照交差。

黃智賢與同劇演員有講有笑，身旁的陳慧珊繼續Cool爆！

陳慧珊昨日繼續為無綫劇集《波士早晨》在將軍澳電視城的古裝場地拍攝，更在短短幾小時內做齊大將軍和尼姑，加上化身住持方丈的黃智賢、將軍兼尼姑的李佳芯及小和尚洪永城，眾人造型為本是時裝劇集的《波》劇增添不少喜劇效果，有借古諷今的味道。

唔肯影單人相

不過前日《波》劇在外取景時，Flora擺阿姐款兼黑面掟劇本的事見報後，昨日如常開工的她似乎對報道無動於衷，拒絕接受記者訪問，對着記者時一臉嚴肅，起晒弶之餘更不應要求拍攝單人照片，並說：「我唔需要影單人相。」只答應影團體大合照應酬記者，其後繼續背向記者，連眼神接觸都非常罕有。

雖然昨日的報道中已有不少同劇演員為Flora講盡好說話，但Flora仍然堅持其「不想工作受影響」而無視回應報道的澄清機會，同場的黃智賢惟有力撐為Flora解畫：「要求高係好事嚟，為個戲好啫！（拒絕影單人相？）係咩？呢個我都唔知喎！不過我哋平時都有講有笑咩都講，溝通上完全冇問題，可能係佢角色比較嚴肅，畀人影到啲相話佢黑面，有誤會啫！佢個角色係比較黑白分明。」

帶挈李佳芯上位

而昨日陪Flora跑足兩場的佳芯更笑稱Flora拒絕接受訪問間接令她上位成為受訪對象，問她Flora自毀形象捧紅其他人？佳芯笑住撐：「可能佢擔心套戲服咁快穿崩啫！」