無綫藝人湯洛雯（Roxanne）成為《學是學非》的固定班底後，火速和黃心穎及李佳芯等成為好姊妹。斯文大方的她，閒時最愛「宅」在家中整蛋糕，為了保持完美肌膚，崇尚無添加的她更學整手工皂，實行要靚得天然又「梘」單！

形象斯文的Roxanne，在家中是個愛綁「噴泉頭」的乾物女。

最愛整蛋糕的Roxanne去旅行時亦不忘與立體蛋糕影相。

正忙於拍攝《刀》劇的Roxanne（右二）希望讓觀眾留下深刻印象。

Roxanne（左起）、黃心穎、李佳芯、梁嘉琪、麥美恩及張秀文透過節目成為好姊妹。

究竟點梘?

Step1：將新鮮番茄榨汁。

Step2：將番茄汁放入雪櫃，直接凝結成冰狀。

Step3：將氫氧化鈉倒入番茄冰塊，番茄冰變成溶液後，將液體倒入預先已混和的植物油，用手打50分鐘至軟雪糕狀。

Step4：混和已經磨成粉狀的新鮮亞麻籽。

Step5：倒入矽膠模，等待至變為固體狀。

港姐出身的Roxanne，加入無綫後拍了不少劇集，最近亦有幸加入節目《學是學非》的大家庭，與黃心穎、李佳芯及梁嘉琪等合作，幾個女仔更相處得十分融洽：「我本身比較慢熱，但係見到佢哋成日大癲大肺咁，令我好快就同佢哋熟到！啲教授平時個樣正正經經，但拍攝嗰陣仲會同大家玩埋一份，寓工作於娛樂，所以拍得好輕鬆好開心！」

飲得有「營」 跑得有勁

樣子甜美、身形高挑的Roxanne，對護膚收身自有一套方法，崇尚天然產品的她今次去學整手工皂，更特地選了番茄及亞麻籽做材料，貪其有美白功效，首次親製手工皂的她大呼好玩：「本身好鍾意天然嘅Product，之前有試過上網學整雞蛋撈蜜糖嘅自製Mask，出面好難買到冇化學成分嘅產品。」

談到護膚心得，Roxanne表示原始又簡單的才是最佳妙法：「我嘅護膚心得就係飲水同瞓覺，試過有一排係咁飲水，嗰排皮膚真係好好多，以前成日大魚大肉，依家食好多蔬菜，同埋我成日飲暖嘢促進血液循環，依家又有飲排毒果汁，可能3日淨係飲果汁，清吓腸胃，等個身唔好咁毒。」

除了靠「飲」來Keep住靚靚身形，Roxanne亦是個「跑」得之人：「平時冇咁得閒就會去Gym Room，或者喺屋企踩吓單車機，冇咁忙嗰陣會去海旁跑步，有段時間為咗收身，每晚都會跑8至10公里，就算嗰排好忙都會堅持跑，之前都有玩過瑜伽，流汗流得好勁，拉筋都好緊要。」

愛心蛋糕 朋友有「So」

好靜的她閒時喜歡留在家中，她笑言是個愛綁「噴泉頭」的乾物女，嗜甜的她亦是個蛋糕達人，最近她更向高難度挑戰學整立體蛋糕：「最拿手係整Cheese Cake同Tiramisu，一有朋友生日我就會整，呢排仲自學緊整3D立體蛋糕。（難整？）上網睇吓教學，試多幾次就識，不過整呢款蛋糕好花時間。」

提到減壓，Roxanne的最佳方法便是旅行：「通常每半年去一次，同屋企人一齊去多，時間易就啲。」為了有多元化發展，Roxanne亦想多學幾門手藝自我增值：「近排最想學唱歌、跳舞同普通話，早排返內地做節目，發覺普通話麻麻，所以想學好啲。」去年她參演內地真人騷節目《我不是明星》，喜獲更多觀眾認識：「拍完節目後微博多咗粉絲關注我，都想有多啲內地節目嘅演出機會，依家都有啲內地嘅Job傾緊！」她又希望嘗試演奸角及搞笑的角色，突破向來的斯文框框，有份拍攝新劇《刀下留人》的她透露今次的角色是新嘗試，期望觀眾有耳目一新的感覺。