前港姐季軍劉佩玥當選後感情一直真空，《好報》日前獨家直擊她暗交四太梁安琪的二公子何猷亨，齊齊談心食意粉。事後她冧讚對方很有心，未有想過嫁入豪門的她只希望獲另一半疼錫及能互相溝通！

港姐劉佩玥最近情路有新動向，對「新歡」猷亨讚不絕口！

Moon主動摸猷亨手仔，是否想安撫對方「寂寞的心」呢？

最新一期《好報》捕獲Moon與猷亨暗角談心。

劉佩玥（Moon）於本月二日晚上被《好報》直擊拍攝無綫新劇外景，期間一部價值約129萬元的凌志房車「到訪」，原來是賭王公子何猷亨拿着一盒外賣意粉落車，並與Moon步向暗角坐下，猷亨促膝而坐及細看Moon品嘗意粉，Moon則邊吃邊以嗲聲及萌樣耍冧，猷亨一臉受落。其後猷亨似向Moon吐苦水，細心聆聽的Moon一度將手搭在猷亨手背以作安慰，不一會便發現記者，猷亨即召來座駕登車離開，Moon則留守及與男方保持通話！

「成日講佢父母」

事後記者聯絡Moon，她說：「大家喺活動上認識，時間唔係太耐，當晚佢喺附近食嘢，順便過嚟探我班同買啲嘢畀我食，好開心，覺得呢個朋友好有心！（追你？）唔係，大家係朋友。（發展機會？）暫時冇諗呢啲嘢，公司都畀好多工作機會我。（嫁入豪門？）冇諗過要嫁有錢人，我認為筍盤定義唔係用錢去衡量，最重要溝通到同錫我，就算好有錢但唔錫我，又溝通唔到、夾唔到都冇用。（要加深認識？）大家都有共同朋友，慢慢做朋友先囉。」Moon又大讚猷亨年輕冇架子及平易近人：「同佢傾偈成日講佢父母啲嘢，知佢好孝順！」她表示看完報道都不緊張，有與對方聯絡，只覺得啖笑！

四太讚有禮貌

至於四太梁安琪則透過電話表示：「知佢哋係朋友，係喺我哋保良局活動識嘅。（見過Moon？）有，喺無綫活動見過，而且嗰年港姐都好支持我哋保良局活動。（對佢印象點？）佢哋個個港姐都好好，好有禮貌。（對Moon有冇特別印象？）總之個個都差唔多，都好好。（如果做你新抱好唔好？）嘩！呢啲嘢你問番猷亨啦！而且佢仲咁細個，未有耐講呢啲啦！」

跟Moon同屆的陳凱琳表示有留意報道：「覺得佢哋係好傾得埋嘅朋友，做朋友冇乜嘢！（覺唔覺得Moon有機會嫁入豪門？）兩個人傾得埋就傾得埋，唔會睇對方家境。」Moon好友蔡思貝則說：「同佢係好姊妹都會關心吓，等我八吓先，我又要食意粉呀！」