模特兒Alice B.與巴西男模男友拍拖三個月便閃電分手，惟男友死纏爛打，更化身「厲鬼」跟蹤她，以致Alice情緒崩潰，不但激動得掟電話，更向友人哭訴！擔心安全的她揚言不排除報警處理！

因前男友死纏爛打，Alice B.（左）與友人訴苦，滿面愁容。

憂心安全的Alice B.喊爆，狀甚委屈。

驚爆與巴西男模三個月「閃分」的Alice B.借酒澆愁。

友人給予Alice B.一個熱情擁抱。

Alice B.與友人分享電話內的訊息。

身為「第四代Canon甜心」的Alice B.日前與一名女友人現身上環一間餐廳，全黑打扮的Alice全程愁眉深鎖悶悶不樂。點了兩支啤酒的她們邊喝酒邊聊天，Alice看來應是找朋友訴苦。

滔滔不絕的Alice全程指手畫腳，並向友人展示電話訊息。期間她的情緒顯得相當不穩，時而傷心痛哭，時而激動得把電話掟到枱上。身旁的友人不時為她抹眼淚，並輕摸她的頭部及肩膀，再送上一個大大的擁抱，希望有助平復Alice的心情。Alice深明好友的好意，強顏歡笑。Alice看似有吐不完的苦水，傾談了個多小時才雙雙離開餐廳。

憂安全受威脅

事後本報記者致電Alice，問到為何情緒崩潰？她才將事情和盤托出：「我同拍咗拖三個月嘅巴西男友分咗手！（點解？）佢喺廣州做嘢，但係成日突然之間唔見咗人，我覺得好冇安全感，所以向佢提出分手！」

惟男友對Alice死纏爛打，更悄悄跟蹤她，令她擔心安全受威脅：「佢仲成日搵我，仲喺WhatsApp度講出我一日嘅行蹤，話見到我同第二個男仔約會，仲自稱係『Ghost（鬼）』，因為佢神出鬼沒！佢真係令我覺得好嬲，同時又好驚！」

或考慮報警

她又憶起恐怖經歷：「佢令我諗起五年前嘅德國男友，分咗手之後，佢跟到我返屋企！好彩嗰時有我當時嘅男友在場，先至冇事！（會唔會報警？）我會考慮！」事實上年紀輕輕的Alice人生十分坎坷，曾經歷母親患病、患抑鬱症、甩拖及財困等問題。