亞姐出身的筱靖原來最愛零食，卻仍能保持「零痘痘」的白滑肌膚！她自爆秘訣全靠徹底卸妝：「我做嘢每日都要Hold住個妝十幾個鐘，中途又要補妝，加上我最鍾意食薯片，會咩都唔理，有幾熱氣就食幾熱氣，所以每日都要用卸妝水同卸妝油，落妝搞足半個鐘！我落得唔夠乾淨嘅話，第二朝會即刻爆瘡。」自稱肌膚極度敏感的她，推薦以「碳粉Facial」取代磨砂潔面：「化得妝多會堵塞毛孔，但我一磨砂清潔就會爆微絲血管同出疹，所以皮膚科醫生叫我每兩星期就去搽黑塊面，用激光機做碳粉Facial，之後再用礦物水噴吓塊面打底就搞掂！」

筱靖勤力護膚及努力做Gym，保持最佳狀態！（資料圖片）

女人唔可以懶！貪靚的筱靖自爆每日花半小時卸妝。

筱靖又透露每日花一小時做Gym：「我日日都盡量抽時間去會所跑步同踩單車，除非出Trip或開工就真係冇辦法。（咁有恒心？）做開運動就會想繼續做，而且我算好懶o架喇！」