憑無綫劇《四個女仔三個BAR》升呢宅男女神的劉佩玥，自小是個「電視精」兼一心想勇闖影視圈，雖然眼見好姊妹陳凱琳及蔡思貝率先有機會拍劇，但從不計較得失的她未感壓力，反而最擔心「長憂一百零一」的媽咪，皆因自小在溫室長大的她為拍劇捱更抵夜，自然令父母大感心痛！而視大師姐胡杏兒及佘詩曼為目標的佩玥，自爆恨與偶像歐陽震華及「男神」彭于晏合作。

「溫室玫瑰」Moon如願加入影視圈，夢想高飛！

自知演技尚有進步空間的Moon，自評處女劇表現有70分。

港姐季軍Moon未有介懷比同屆冠軍陳凱琳（中）及亞軍蔡思貝（左）遲起步拍劇。（資料圖片）

好學的Moon（右）於處女劇向子羚及阿蔣偷師。（資料圖片）

搞鬼的Bobby演戲經驗豐富，難怪吸引Moon追看其作品！（資料圖片）

女神Moon恨與「男神」周杰倫及彭于晏合作。（資料圖片）

周杰倫（資料圖片）

彭于晏（資料圖片）

劉佩玥

看淡得失：人比人比死人！

勇奪2013年港姐季軍的劉佩玥（Moon），處女劇《四個女仔三個BAR》贏盡口碑，憑甜美見習事務律師Holly一角升呢宅男女神，人氣急升！對於首次拍劇的表現，Moon不論播出前後都自評70分，又獲親友來電讚好，當然她亦自覺演技有待進步：「未出街有70分，50分係勇敢分，20分係學習得着；出街後都係70分，我嘅得着又再多啲，有35分，另一半有夢想成真嘅感覺。外界嘅評語都唔差，無論好定壞都好感動人哋有關注。」談到有幸跟一眾實力派前輩如黃智賢（Ben）、姚子羚及蔣志光（阿蔣）等合作，她坦言獲益良多：「劇中子羚同阿蔣都係我師傅，現實中佢哋都算係我師傅，無論戲外戲內都會同我分享佢哋多年嘅經驗，阿Ben都會同我講有乜地方可以再做好啲，好開心啲前輩會教路！」

「唔會為贏人去Push自己」

提到同屆港姐冠軍陳凱琳（Grace）及亞軍蔡思貝（Sisley）未卸任已劇接劇，Moon當時則擔任綜藝節目《安樂蝸》及《激優一族》等主持，在戲劇方面較遲起步，但她卻稱未有壓力：「當選港姐一個月後已經要做綜藝節目，佢哋就入咗藝訓班，我要邊學邊實習，得着唔會比佢哋少，人比人比死人！有機會時好好把握就得，唔比較就最良性，當然進步人人都需要。」自認性格古怪的她從不在意得失，只享受學習過程：「啲同學成績好好，又出去比賽，但我唔係嗰啲人，唔會為贏人去Push自己，媽咪由細教我唔好跟住人跑，自己識跑先欣賞到沿途風景！」

拍足40小時「濕濕碎」

常說無綫是個「木人巷」，趕劇的演員要由朝早拍到凌晨，每日睡不足兩小時又要開工，捱得是「常識」吧！生於小康之家的Moon自幼在溫室長大，雖要不眠不休拍足40小時，惟對捱得的她來說可謂濕濕碎。她初入行時令媽媽擔心不已，慶幸她是個自律及不愛夜蒲的乖乖女，漸漸獲得媽媽的了解及信任：「媽咪擔心我唔夠瞓唔夠食，佢見我後期愈來愈瘦，我有同佢講頂得順，如果佢唔瞓又唔開心，我點無憂地實踐夢想呢？（覺得娛樂圈係個大染缸？）細個佢有講過要小心，佢話學乖要三年，學壞只需三分鐘，呢個世界好多引誘，媽咪乜嘢都憂慮，佢係『長憂一百零一』嘅，依家要做啲嘢去Build Up好信任，首先一定唔會唔聽佢電話，又會話佢聽拍到幾點。」

目標明確：恨親近彭于晏周杰倫

自小愛煲劇而成「電視精」的Moon對無綫劇集瞭如指掌，連一班花旦小生於劇中的角色名都記得一清二楚，大學時更修讀香港浸會大學的電影電視課程。她直言恨與戲劇大師「King Sir」鍾景輝、眾人契爺胡楓（修哥）及歐陽震華（Bobby）合作，甚至經常幻想做King Sir及修哥的孫女。由《壹號皇庭》到《情逆三世緣》，Moon笑言Bobby的每部劇集都有追看：「《美味天王》真係冇得輸，同Bobby哥哥合作我一生都會好開心，一定得着好多，希望喺前輩身上學得更多。」

向杏兒阿佘進發

哪拍談情戲呢？封台灣型男彭于晏（Eddie）及周杰倫為「男神」的Moon，希望分別跟兩人在戲劇及音樂上合作：「Eddie好突破、好投入去做一樣嘢，我覺得男仔內在比外在更重要，佢喺《破風》又練到好似專業單車手咁，令我好相信佢做緊嗰樣嘢，我覺得男仔有上進心好重要！」與胡杏兒及佘詩曼同屬港姐季軍的Moon，更視兩位大師姐為目標：「好欣賞杏兒，佢每年嘅進步都好大，好肯突破自己，我都有少少情意結，如果我好似杏兒同阿佘咁努力，都希望可以做到佢哋咁好。」

超齡學生妹

外表斯文的Moon實質相當健談，不論拍劇、煲劇、男神或家人等話題都非常Talk得，更對任何事情抱學習態度，就如受訪當日，她對打燈及攝影均感興趣，不停向攝記提問。勇於嘗試的Moon早前又為新劇《殭》剪掉一把秀髮，但她未有感到可惜，反而專注於角色上，其實短髮更凸顯Moon活潑爽朗的一面！