任達華日前因在意大利工作未能出席新片首映，而遭吳鎮宇「揶揄」，華哥昨日趕返香港謝票，鎮宇卻未見現身，表示「最唔滿意吳鎮宇」的華哥即反擊：「放假大晒咩！」

返港謝票的華哥以眼還眼寸鎮宇。

華哥餵阿譚（左）與姜皓文食薄餅，大搞氣氛。

吳鎮宇

華哥、阿譚與姜皓文相當受影迷歡迎。

日前吳鎮宇出席英皇電影《衝鋒車》首映，見拍檔任達華缺席即說：「歐遊大晒咩？」其實當時華哥身在意大利拍攝新片《魔卡行動》，絕非因私忘公。華哥昨晨返抵香港，下午即趕往戲院會合姜皓文及譚耀文謝票，更買薄餅與拍檔分甘同味，三位型男出現，令影迷非常興奮，更有人爆粗讚華哥靚仔。

阿譚姜皓文力撐

談到意大利之行，華哥笑說：「本嚟諗住拍完戲會去英國放假，回心一諗都係飛返嚟謝票，不過返到嚟就唔見咗鎮宇喎！佢就真係『放假大晒咩』。（《衝》片首日收70餘萬票房滿意？）我最唔滿意係吳鎮宇啫！」阿譚及姜皓文亦幫口說：「問極鎮宇同佢經理人，都唔肯講去咗邊，覺得有啲嘢囉！」由於《衝》片口碑不俗，電影公司計劃舉行慶功宴。

想收藏《勝者為王》

華哥、阿譚及姜皓文曾為亞視拍劇，談到亞視即將「消失」，姜皓文說：「我對佢（亞視）死咗心好耐喇！係戥班舊同事唔抵啫！」華哥則忽發奇想地說：「我好鍾意自己套《勝者為王》，可唔可以買番嚟自己收藏呢？」