35歲的楊怡與30歲的羅仲謙拍拖三年屢傳婚訊，二人事業發展愈見順利，搵錢之餘更有意齊齊置業投資，有讀者爆料指昨晨見二人情侶裝睇樓，看來有意築愛巢為婚事鋪路！

羅仲謙承認有意投資，故找女友楊怡畀意見。

楊怡

楊怡與年輕5載的男友羅仲謙愈愛愈公開之餘，更屢傳婚訊。昨日有讀者撞破二人約早上10時半以情侶裝打扮戴帽現身紅磡，排隊購置將軍澳日出康城的緻藍天築愛巢。現場人多擠迫，只見二人手持售樓書頻頻交頭接耳，謙仔更充當護花使者，護住女友及同行的「未來外母」楊媽媽免受碰撞。

買樓先問女友意見

昨日聯絡楊怡，問到與男友睇樓一事時，她說：「佢投資啫！我有啲心得，大家互相分享，結婚就唔會住，係以後嘅嘢，唔係依家講。」看來稍後可以期待二人的好消息。她笑言今次又抽不中，下次會再嘗試。謙仔則向記者承認有意投資：「阿怡有畀意見我，揀將軍澳係因為近返工，而且我好欣賞嗰度嘅規模同潛力。（係咪兩個人夾錢買樓？）當初有幾個方案，反正抽唔中，都Plan唔到下一步。」

事業起飛賺人仔

楊怡與謙仔近年事業一帆風順，今次有意夾份置業擺明好事近。楊怡去年與無綫續約兩年，亦有買樓經驗，去年她抽中大角咀奧朗御峯但未成功購入，之後又抽紅磡城中匯。而謙仔近年事業發展平步青雲，去年以開心價與經理人公司星皓加簽九年，最近擔正無綫劇《衝線》男主角之餘，片酬又跳至逾200萬人民幣，更接拍大片《西遊記之孫悟空三打白骨精》飾演「沙僧」，愈搵愈多的他卻緋聞纏身，早前有指他被合演《衝線》的蔡思貝電到暈陀陀，楊怡要全程遙距「（目及）實」謙仔。