范振鋒面部中拳閉關療傷
藝人范振鋒前晚參加朋友飲宴後搭的士返抵荃灣寓所時，與一名帶有醉意的男子發生口角，繼而大打出手，被對方打傷面部！警方到場以涉嫌在公眾地方打架拘捕兩人，范振鋒昨日透過電話表示對方是樓下鄰居，決定暫時閉關在家休息。
范振鋒原定與太太李思欣睇騷撐老友，如今決定閉關唔見人！
范振鋒涉嫌在公眾地方打架被捕，在警方陪同下到醫院驗傷。
呂姓男子事發後一同送院，期間情緒激動。
李思欣見到范振鋒時忍唔住喊。
並即與母親（左）急急到醫院了解。
現年41歲的范振鋒（Ricky）近年百足咁多爪，做主持又搞飲食業，旺爆的他前晚卻遇上無妄之災！前晚11時許，他參加飲宴後搭的士返荃灣青龍頭寓所，落車時與一名帶醉意的呂姓男子先口角繼而動武，警方接報到場調查，兩人涉在公眾地方打架同被捕！Ricky的口、鼻、額及眼部受傷，呂姓男子則眼部受傷，雙雙由警方陪同下送院。Ricky老婆李思欣接獲消息後與母親到場了解。
車廂內困獸鬥
Ricky昨日接受電話訪問時強調當時並沒有飲醉，神志十分清醒，指對方雖是樓下的鄰居，但並不認識對方：「我夜晚十點幾上的士，返荃灣都要35分鐘，乜都醒晒啦！我當時畀緊的士錢，開埋門準備落車，點知離遠見嗰個人（呂姓男子）不停對住空氣鬧同衝過嚟我架的士，好似想上埋嚟咁。我哋有幾句爭執，佢先出拳打我塊面，我梗係自衞還手，但佢仲衝入嚟車廂打我，打咗我好多拳，我亦唔知還咗幾多拳。」問到有否因講了一些挑釁性的說話而令對方激動？Ricky說：「我只係『趷』咗佢幾句，話咪阻住落車，但佢表現得好激動。（佢用粗口鬧你？）我唔知佢講乜，總之就好怪，嘈到有鄰居報警。阿Sir嚟到住佢，上晒手銬同落鐵鏈。」問到Ricky是否有意搬屋？他說：「我都諗住搬喇！我諗係因為犯太歲，攝咗太歲但未買吉祥玉有關！」
李思欣見夫爆喊
Ricky透露鼻與面均有傷，現已無大礙，原定昨晚與老婆到紅館欣賞好友吳國敬的演唱會，但因這件不快事件而身心俱疲，故決定留在家中休息：「尋（前）晚又要去屯門醫院驗傷，又要去荃灣警署落口供，搞咗成晚冇瞓，個樣好殘好衰，更加唔想搶阿敬風頭。」
至於李思欣則表示當見到老公即忍唔住喊：「每年都有搵師傅睇風水同運程，都有叫我哋注意出入。尋（前）日打畀老公，點知係警察聽電話，仲話佢出事，我即刻飛落樓下，見到佢忍唔住喊，好心痛，但知道佢係皮外傷都放心啲。」她力撐老公為人理性，甚少發生不愉快事件。
