有人說，在職場上往往要戴着面具，隱藏自己最真實的一面，打工仔如是，藝人亦如是！對人歡笑背人愁幾乎是雨僑的指定動作，為追音樂夢更試過身兼百職一腳踢，壓力爆煲暴瘦至90磅，但仍要唧起硬繃繃笑容。

雨僑一條龍搞晒出碟工作，搞到長期失眠兼暴瘦。

雨僑為圓音樂夢而頂硬上，不介意一腳踢。

隨着張智霖等加盟而增加資源，雨僑笑言可以做番歌手！

娛樂圈打滾六年的雨僑，歌影事業機會不斷，但原來風光背後，有着另一段辛酸故事，就如其新歌《糖衣》所講一樣，外在甜蜜卻內藏迷惘。當年，雨僑所屬的公司主打電影，醉心音樂的她惟有靠自己，初出道時憑一己之力包辦唱片：「老闆日理萬機去搞電影，佢肯去投資幫我出碟，但我要一個人做晒！最老土係以前去音樂人飯局拎晒人哋公司卡片，然後逐個打電話問有冇新歌畀我。」

爛面成日病

揀好心水歌後，雨僑要開始埋首構思新碟主題，最後寫報告書請示老闆：「上面一批就畀錢我去做，嗰時我個妹妹仔助手幫我搵CD盒，到出碟時我哋喺度寫統籌、策劃，全部都係自己，寫到有啲唔好意思。」為圓音樂夢，她樣樣靠自己，有冤無路訴，最後壓力爆煲暴瘦至90磅：「壓力大到瘦到得番90幾磅，所以嗰段時間係最辛苦，長時間不眠不休，搞到賀爾蒙失調，成塊面都係暗瘡，仲成日病添。」

唔計較回報

幸好坎坷過後有艇搭，隨着張智霖與鄭欣宜等加盟，公司決定為旗下藝人找唱片公司，雨僑說：「我終於可以跳番出嚟，專心做番歌手，各樣配套都好好多。」提到曾呻樂壇唔易撈，她說：「只要我一日有老闆支持，我都會繼續做！雖然開支龐大又未必追得番，但係我覺得藝術嘅嘢係唯一冇得計較回報。」