「圈中筍盤」鄭嘉穎被《好報》踢爆與年輕22載的陳凱琳暗撻！昨日二人回應時夾晒口供，嘉穎承認陳凱琳有到訪其寓所，二人又同聲同氣表示年齡差距不是問題，溝通最重要！

鄭嘉穎笑言若想他娶老婆，便要外界「高抬貴手」。

陳凱琳表示拍拖不介意年齡上的差距。（資料圖片）

《好報》報道陳凱琳自行摸上鄭嘉穎寓所。

昨日《好報》踢爆45歲的鄭嘉穎有新戀情，與23歲無綫新一代女神陳凱琳（Grace）暗交兩個月，Grace更被拍到於嘉穎大坑寓所「短聚」兩小時！嘉穎昨日返將軍澳電視城為劇集《殭》開工，即被追問戀情，為保護愛情幼苗，他繼續密冚戀情，只稱對方是朋友關係，談到陳凱琳曾單獨上其寓所，關係非比尋常。

「溝」得掂至緊要

嘉穎笑說：「嗰日喺會展做完Filmart，我要繼續開工，之前同佢傾電影，佢好上進鍾意睇戲睇劇，想演技有進步空間，我屋企非常多DVD存貨，所以同佢講，想借嚟睇咪上嚟囉，當日我要開工唔喺屋企，佢上嚟有工人開門，就係咁簡單，唔好諗咁多，好多人都上過小弟屋企，唐詩詠、馬國明、曹永廉、林子善有排數喎！（Grace成日上你屋企？）一次咋！（對佢有冇感覺？）依家係朋友感覺。（發展機會？）任何嘢都由朋友開始，唔可以講得咁死，依家就只係朋友、同事。（年紀差距會唔會障礙？）小弟唔會考慮呢個因素，主要係睇溝唔溝通到，Timing啱唔啱。」

咁啱借嘢斷正

至於Grace明顯跟嘉穎已夾了口供，昨日口徑一致地回應：「當日傾完電影嘢，再去Filmart，之後上咗佢屋企借碟，係工人開門嘅！（影到嘉穎車你走？）嗰日佢拍完嘢，有個Break返屋企，咁啱我攞完碟，又要返電視城，所以佢咪車埋我囉！」但問到為何返到電視城時又刻意前後腳入門口，看來相當避忌，Grace即扯開話題說：「唔需要避忌，真係冇嘢，避咪仲奇怪！」而當談到情侶年紀有距離的問題，Grace跟嘉穎則心意相通，笑說：「年紀唔係問題，夾唔夾到同溝通到先係最緊要！」