杜德偉的紅館個唱繼續貫徹「少少鹹多多趣」作風，除了辣身舞拍籮外，亦唔少得招牌《脫掉》脫剩閃爆紅底晒「巨星鵰」，更誘得瘋狂歌迷「藉着飛Bra說愛你」！

Alex連環脫，晒出閃亮紅三角底，身材甚弗！

Alex與舞蹈員跳辣身舞揭開序幕。

杜德偉（Alex）一連兩場《杜德偉極杜世界巡迴演唱會Part II》前晚假紅館開鑼，Alex今次繼續施誘，甫出場便與三點式舞蹈員跳辣身舞，更手多多拍對方屁股。由於曾有網民誤認他為許志安，Alex不忘自嘲說：「自己離開香港太耐，好多人唔知杜德偉係邊個，你哋有冇買錯飛呀？安仔就快開演唱會，今晚係杜德偉！」

自轉一周任人睇

Alex在歌迷堆獻唱時一度感觸落淚，又說：「你估我好鍾意喺萬幾人前除褲？冇人逼到我做唔鍾意嘅事，就好似結婚同生仔。」但全晚高潮仍落在他獻唱經典金曲《脫掉》時，身上大褸及長褲被性感女郎逐層撕開，最後剝剩白色平腳底褲，Alex索性親自脫掉，露出終極紅色閃爆三角褲，「小Alex」位置更有巨型星星，他又360度自轉晒「Big鵰」，任影唔嬲，有歌迷熱情掟紅色胸圍上台示愛，更附有姓名及電話。

畀老婆Check咗先

對於歌迷飛Bra傳情，Alex在後台笑說：「可能我哋脫得幾淋漓盡致，不過開心見到觀眾都放得開，希望唔係即刻除出嚟。（打電話畀物主？）畀老婆檢查吓先，印象中未試過收（胸圍），通常都係我掟底褲出去。」他表示Part I時不少歌迷投訴未能一睹「雄風」，故今次索性自轉一周滿足大家。

當提到操肌辛酸史，Alex說：「聽哥哥（杜德智）講我好過上次，呢個年紀操肌比較辛苦，後生仔嘭一聲啲肌肉就出晒嚟。最辛苦係食『六親不認餐』，食糙米同好多菜，一開騷就最期待慶功嗰餐。」對於有傳個唱銷情麻麻，他說：「冇理咁多，做好本分。」