陳豪寸爆蓋鳴暉「每日一啡」耍冧

粵劇名伶蓋鳴暉（Joyce）於劇中飾演豪爽的女文武生，與寸嘴的室內設計師陳豪及「二世祖」麥長青譜出一段蘊含粵劇精粹的都市情緣！與陳豪相隔多年再合作的Joyce，自爆對方升呢人父後性情大變：「我哋對上一次合作，佢Cool到死又冇嘢講，但依家有愛情同家庭滋潤就唔同晒！」而在劇中性格自負的陳豪起初會與Joyce鬧不和，更出言寸爆對方，但原來鏡頭外他對全廠同事相當體貼，「每日一啡」贈大家，Joyce笑言被陳豪冧爆：「佢帶咗部咖啡機嚟開工，晚晚煲咖啡畀我哋飲，仲不停講爛Gag氹我哋笑！」Joyce表示今次屬本色演出，更為演活「戲中戲」而弄致雙眉流血兼含膿：「今次想將粵劇帶入屋，拍攝時劇組訂晒場地同布置，我仲吊眉吊足14個鐘，拍完皮都鬆晒，仲流血同含膿，要每日搽燒傷膏藥。（咁搏？）唔好理我點摧殘自己，最緊要出鏡靚！」