隨着社交網絡發達，藝人與Fans的互動頻繁，性騷擾事件亦時有發生，最近黃美棋便被人在Instagram上公然以猥瑣字眼問價，氣得她要「Cap圖」放上微博鬧爆！

黃美棋出席電台活動時心情大靚，似乎已忘卻被問價的事。

事緣美棋日前趁天氣轉泠，特地上載一張穿便裝的自拍照，並留言提醒Fans注意保暖：「今日天氣涼咗好多，記得要着多件衫。」原本是一則溫馨提示，豈料有人留言向她問價，言詞露骨兼猥瑣，更叫她以私信聯絡。留言一出即氣得美棋將該名網民的留言「Cap圖」，並上載微博鬧爆：「好嬲呀！這些話已造成性騷擾！！麻煩不要在我的Instagram留這些留言，請尊重自己，尊重別人！！」更即時剷走留言。其後，美棋透過經理人表示：「美棋嘅Fans一向都好好，突然遇到呢種情況當然好嬲同覺得受侮辱，所以先言明對方嘅惡行。」

食雪糕啟發「任務」

而心情已回復靚靚的美棋昨日到電台受訪，她透露近日正忙於在社交網站玩「一日一任務」的活動：「其實遊戲源自我有日食雪糕，突然好想一啖食晒佢，但原來係唔得，於是令我想喺網上收集大家提議嘅不可能任務，嘗試做到然後拍片分享。」

敷面膜行街找數

美棋表示至今已完成用腳飲奶、倒立食杯麵和十五秒內食十五粒棉花糖：「食棉花糖我失敗咗，我亦都會接受網民提議嘅找數方法，就係敷住面膜喺尖沙咀行街。」還笑言這系列搞笑短片的拍攝過程很開心。她又指目前是自由身，但已有新經理人公司接洽，相信下月便可以公布。