鄧麗欣圓夢打造索爆女排

曾是港青排球隊隊員的鄧麗欣（Stephy）為圓排球夢，積極招攬隊員，組織了球隊「Loey」，隊中不乏省鏡「球花」，成功打造「索爆女排」！Stephy又自爆與隊員首次見面時，被誤以為拍攝整蠱節目，期間又有隊員中途退出，阻滯重重！

奮力接球的Stephy搞到雙膝又紅又瘀。

雙膝又紅又瘀。

Stephy熱身時拉筋，身體非常柔軟。

Stephy跳起扣殺，力度十足。

Stephy扯頭纜的「Loey」排球隊不乏靚女。

梁諾妍（Inez Leong）

歐家裕（Joe Au）

鄧麗欣為圓排球夢，自資組織了球隊「Loey」。上周日（本月15日）球隊首戰落敗後，前日她便與另外10名隊員齊齊練波兩小時。熱身時，Stephy認真拉筋，31歲的她柔軟度依然很高。雖然有記者在場，但教練並沒有因此錫住她，反而一分鐘內不停左右掟波要她單獨接，Stephy又飛身，又跪地接波，更幾度為救波仆落地，搞到雙膝通紅都毫不介意！當分成兩隊打友誼賽時，擔任「大錘手」的Stephy亦有板有眼地扣殺及攔網，昔日的「排球女將」果然不是浪得虛名！

詩雅師妹Inez加盟

打造了「索爆女排」的Stephy原本計劃組織明星排球隊，但最後因太少圈內人識打排球而打消了念頭。問到喜歡的女排選手，她興奮地說：「鍾意王一梅！再之前就孫玥，靚女嘛！沙賓娜都有留意，所以亦令我想搵多啲靚女嚟打波，竟然畀我搵到！」現在球隊隊員中不乏養眼「球花」，包括Mandy Lieu師妹Joe及連詩雅師妹Inez。

中四開始打排球的Stephy曾經不理儀容，竟到沙灘打排球而曬黑。她坦言最後為工作而放棄排球令她遺憾，她說：「我19歲未入行時，接咗護膚品廣告，如果去泰國打波曬黑就拍唔到，二揀一時揀咗做嘢，諗番都幾遺憾！」能重新再打排球，她最多謝教練，她說：「好多謝呢位教練，我哋好似人哋識女仔咁上網搵隊員，第一次同啲隊員見面時，佢哋以為係拍緊整蠱節目！」Stephy又表示球隊練習時十分認真，有些隊員更因此而「縮沙」！由於未來球隊會參與很多慈善活動，所以她希望可以再招攬更多志同道合的隊員。

被屈做隊長

問到練波是否辛苦，Stephy表示以前打港青排球隊時已習慣，她說：「以前真係完全唔錫身，依家為做嘢會就住唔好撞瘀，不過今日都瘀晒！」着5號仔波衫的她原來以前打學界時亦是「5號仔」，她笑說：「都算Lucky Number！所以第一時間揀番！」她又笑言有「隊長命」，表示今次本不打算做隊長，但最後被教練「屈」了她做！