吳綺莉重提成龍 我冇怪任何人

女星吳綺莉（Elaine）1999年與成龍誕下「小龍女」吳卓林，多年來甚少談論成龍。日前15歲的卓林突然透過學校報警稱被虐打，繼而警方在其家中搜出疑似毒品，原來事情與Elaine飲酒有關，昨晚有線播出Elaine接受好友張學潤（Nelson）主持的訪問第三集，她罕有地開腔提及成龍。Elaine在訪問中表示做單親媽咪壓力很大，但從未怪責成龍，認為是男女拍拖「你情我願」，反而最不喜歡自己。有傳當年收下3千萬元「分手費」，但她否認其事。

張：張學潤　吳：吳綺莉

張：卓林咁大個，有冇同佢講過佢爹哋係邊個？

吳： 唔需要我講啦係咪？其實我冇瞞佢，我覺得屋企人係要溝通囉！只不過係我忽略咗佢唔開心，冇諗過佢咁上心。

張：同學仔會講爸爸o架嘛！

吳： 即係好似一件事一開始冇，之後唔會覺得有，因為由頭到尾都冇，其實成件事係個女擔心我。

定居上海避壓力

張： 當初點解決定有呢個小朋友？有冇諗過後果？

吳： 以前細個唔會講呢番說話，但人大咗，會覺得好多嘢唔係你控制到，係冇得解o架！當時人生去到嗰步就發生呢件事，我呢兩日都不停問點解，但我答你唔到，因為唔係我報警，我都想依家係拍緊外景，唔係接受緊你訪問啦！

張： 當初卓林出世冇耐，你決定去上海定居，點解？

吳（嘆氣）：唉！如果唔係咁，依家嘅佢會更難受，太多輿論壓力，就好似呢件事，每個人有唔同諗法，我呢刻都會承受唔到，出到街咩都會畀人講，100件好事係冇用，小小嘢就夠喇！喺呢個環境，小朋友會承受唔到囉！

張：當年你去上海，好多人話你收咗舊錢！

吳（嘆氣）：唉！你知我由細到大都唔鍾意解釋，我覺得每段關係一隻杯敲唔響，每一件事冇一個人錯晒或啱晒，No one can be perfect，OK？我唔Perfect（完美）就冇資格評論別人。

張：所以咁多年都係你獨力承擔養個女？

吳： 個女係我生出嚟o架嘛！係我個女嚟o架嘛！我唔照顧邊個照顧呢？係咪？

張：喺上海幾年，你做過咩？我知你畫畫好叻。

吳： 做裝修，幫朋友，我自己都做好多木嘅傢俬，做設計啦！畫畫啦！如果唔係都開唔到畫展啦！

張：點解之後又會返嚟香港？

吳： 我覺得壓力係我哋承受得到喇！我又要工作，我覺得生活使乜要同人解釋啫？拍拖男女呢啲嘢係你情我願嘅，啱唔啱呀？過咗去就過咗去，仲講咁多做乜？

只討厭自己

張：你有冇討厭成世都同佢（成龍）扯上關係？

吳（停頓片刻）：唔……每個人遇到嘅嘢唔一樣，我唔係厭倦任何人，如果真係問，我係對住我好攰，我唔鍾意吳綺莉呢個人，我好攰呀！聽到人哋叫我吳小姐，我就好厭。

張：你有冇怪呢個人（成龍）？

吳：冇，我冇怪任何人。

張： 作為單親媽媽係咪有好大壓力？

吳： 所有事都有壓力，係成個Package一包禮物咁，但如果你問我，最唔鍾意係邊個，我最唔鍾意嘅係自己，我唔係講笑！

張：嘗試唔做呢個角色？例如唔做娛樂圈？

吳（嘆氣）：唉！搵嘢笠住自己，人哋都知我係邊個，我離唔開娛樂圈o架喇！有啲嘢呢一世都走唔到o架喇！心入面真係覺得做我自己好攰。

張：有冇想搵番個膊頭挨吓？

吳： 又唔會咁諗，有梗係好啦！都想搵個伴，但呢啲嘢只可以隨緣囉！

張： 有冇因為個女唔識人？或全部都畀個女過目？

吳： 早十年我想花時間喺佢身上，因為我覺得佢有缺失，有啲冇咗嘅嘢，我生得佢出，有啲嘢唔關佢事，唔係佢嘅錯，但呢件事發生咗，可能係因為呢1、2年冇以前睇得咁細呀！我諗要同個女再慢慢消化吓。

張： 希望你好好面對，同個女了解吓，畀心機啦！

吳（終於面露笑容）：係啦！努力工作啦！諗少啲嘢，飲少啲酒啦！