無綫女神黃翠如與韓國男團god成員Danny前晚於尖沙咀拍攝港韓合拍劇《七天的浪漫》，吸引半百途人圍觀！雖然翠如大讚對方靚仔，但亦畀足面男友蕭正楠：「冇人可以同佢比！」

翠如一埋機即交足戲喊晒口，就連Danny都讚好！

於尖沙咀拍劇的翠如與Danny，吸引半百途人圍觀，場面墟冚！

翠如雖大讚拍檔Danny靚仔，但她的世界只容得下蕭正楠一個！

黃翠如前晚偕韓國男團god成員Danny（安信源），殺落尖沙咀拍浪漫愛情劇《七天的浪漫》，吸引半百來自韓國、內地及外地的旅客圍觀及拍照，場面熱鬧。劇情講述剛失戀的他倆初次邂逅，Danny從巴士尾隨對方落車，更上前偷望突然爆喊的翠如。

男友冇呷醋

受訪期間，翠如與Danny互讚對方靚仔靚女，問到男友蕭正楠（Edwin）與Danny誰比較英俊？畀足面男友的翠如笑說：「我心目中冇乜人可以同佢（Edwin）比較！（Danny都比下去？）冇刻意去諗，Danny係好典型嘅韓國靚仔。」談及拍親熱戲會否令男友呷醋？她笑說：「唔會！佢拍呢啲多過我！」

Danny想食點心

而Danny則盛讚翠如是一名優秀的演員：「雖然一個講韓文、一個講中文，言語不通，但翠如嘅表情都交足戲，令我都知道要做乜，演得好舒服。」並指翠如於劇中講廣東話，故學識「多謝」及「女仔」等單字，他希望可抽空四圍遊覽及食點心。