蔡卓妍（阿Sa）破格演出新片贏盡口碑，獲不少前輩大讚演技，阿Sa笑言獲得影后提名已當「攞咗獎」，而不少品牌已對她「虎視眈眈」，爭相贊助她走金像獎紅地氈，令她難以選擇。

對於首次角逐「最佳女主角」，阿Sa選擇輕鬆面對。

阿Sa、柳俊江及華哥笑着與觀眾分享拍攝時的趣事。

華哥與現場觀眾「貼身」互動，令氣氛不斷升温！

阿Sa挑戰性感底線演出英皇新片《雛妓》，電影上映6日收逾800萬港元票房，更令她入圍本屆金像獎「最佳女主角」。昨晚她偕拍檔柳俊江及任達華現身尖沙咀戲院謝票，談到前輩如劉嘉玲、黃秋生及曾志偉等睇好她「開齋得獎」，阿Sa說：「近日收到好多前輩嘅短訊，有鼓勵、有對我演技嘅意見，好想列印晒出嚟，以後如果事業唔如意，可以攞番出嚟睇，鼓勵自己。」

暫無結婚打算

阿Sa認為得獎與否已不重要，並視今次提名為事業上另一里程碑：「依家當自己『攞咗』，個心反而輕鬆咗，之前會覺得Unbelievable（不可相信）囉！總之好心滿意足，不過有獎梗係開心！」由於票房走勢凌勵，電影公司暫定下周舉行慶功宴，且早已Mark實阿Sa的檔期，集齊台前幕後預演慶祝她榮升影后。問到近日外傳她「逼婚」一事，阿Sa沒好氣的說：「澄清咗十幾次，講到口臭喇！總之暫時冇呢方面打算。」

華哥搞喊老婆

據悉，不少品牌睇中阿Sa近日人氣飆升，主動聯絡其經理人公司及造型師，明言想贊助她走金像獎紅地氈，為免「順得哥情失嫂意」，靚女對當晚的打扮造型仍未有最後定案。另外，身為阿Sa拍檔的柳俊江，亦對其演技讚不絕口，認為對方倘若得獎亦順理成章：「拍嘅時候都覺得佢好好喇！攞獎唔出奇。」

而任達華因飛機誤點而姍姍來遲，他笑說：「老婆未睇套戲前，我都驚自己同阿Sa嘅戲份太激，返屋企要跪洗衫板，點知老婆睇完好感動，讚我演得好，仲喊到眼紅面腫，咁我即係唔使跪啦！」