「宇宙最強」甄子丹與太太汪詩詩昨日出席代言廣告首播活動，子丹表示非常恨做超級肥仔而策劃此角色，又透露經常為工作失眠，詩詩即大爆老公曾於熟睡時出手打她！

詩詩攬實「肥仔子丹」大讚得意，子丹唔怕將來中年發福啦！

「肥仔子丹」的化妝落足心機，你睇個下巴有幾多層！

甄子丹與太太汪詩詩昨日以代言人身份出席SINOMAX《用愛．支持所愛》廣告首播發布會，對於在廣告中化身一名超級肥仔，有份策劃角色的子丹說：「我之前從來未做過肥仔，今次係我主動建議咁拍，事實證明太太係更加愛我！」

預告幾年後暴肥

詩詩笑言曾有一刻不認得枕邊人，但她非常喜愛脹爆子丹，認為造型可愛：「我好鍾意啊！覺得好得意！加埋嗰日廣告啲動作就更Cute，不過我真係估唔到佢啲衫着到咁厚都仲可以跳舞跳得咁犀利！（小朋友有冇見過？）佢哋冇見過，因為佢哋要返學，都想畀佢哋見吓。」子丹笑着補充：「其實係畀定一個預告佢哋，我幾年後就會變成咁樣。」

他們分享智能床褥測試結果，分析顯示子丹晚上的轉身次數頗多，他坦言經常為工作失眠：「成日都諗點樣拍戲，諗啲動作設計。（咁有冇試過轉身打到詩詩？）佢同我講試過一次。」詩詩即點頭說：「有一次瞓瞓吓，佢好大力咁推我塊面，我好嬲，之後就成日都背住佢瞓。」問到子丹可有印象？他即笑說：「知都話唔知啦！公報私仇嘛！不知者不罪。」

七歲仔得爸爸真傳

另外，子丹前日亦在微博上載兒子James的跆拳道照片，並高興留言道：「今天我七歲的兒子James考帶通過，他已是紅腰帶了！」